Dili, 20 Janeiru 2015 – S.E. Prezidente Repúblika Taur Matan Ruak, simu vizita kortezia Sekretáriu Estadu ba Komunidade Portugeza, José Cesário, akompañadu hosi Embaixadór Portugál nian iha Timor-Leste, Manuel António de Jesus, iha segunda-feira ne’e iha Palásiu Prezidensiál Nicolau Lobato.

Hafoin remata audiénsia ho Xefe Estadu, ba imprensa sira Sekretáriu Estadu ba Komunidade Portugeza esplika: “Foin konversa ida entre amigus. Ha’u mai transmite fó ha’u-nia kumprimentu, Governu nia kumprimentu ba Sr. Prezidente i reafirma vontade atu kontribui ba dezenvolvimentu Timór nian no ba aprosímasaun ita-nia povu. Ami ko’alia globalmente sobre relasoens entre país rua, ha’u repete, globalmente ami ko’alia forma oinsá ita koopera no importánsia hosi aprendizajen husi língua portugeza maka hala’o tiha ona.”

Nia hatutan S.E. Prezidente Repúblika, Taur Matan Ruak, konkorda ho asuntu hirak ne’ebé sira ko’alia.