Dili, 22 Janeiru 2015 – S.E. Prezidente Repúblika, Taur Matan Ruak, reforsa hanoin Primeiru Ministru, Kay Rala Xanana Gusmão, nian hanoin ne’ebé husu ba eis Komandante Brigada Vermella, Mauk Moruk, atu intrega nia an atu haktuir prosesu justisa ba aktu hirak-ne’ebé nia ho nia grupu halo ona hasoru PNTL foin lalais ne’e iha suku Saelari, Postu Laga, Munisipiu Baucau.

wainhira fó nia mensajen ba, komandantes no ofisiais F-FDTL nivel altu no mediu iha Quratel Jeral F-FDTL iha Kinta feira ne’e, Xefe Estadu hato’o, “Prezidente mós aproveita oportunidade ida ne’e reforsa hanoin Primeiru Ministru nian, governu nia. Mauk nia tenke mai intrega nia an, ha’u fiar katak nia hatene katak it- nia nasaun, nasaun ida ke liu hosi sofrimentu barak, tanba ne’e ita la persija terus tan, la presija problema iha, ita persija halo nu’usá mak hetan dalan ba dezenvolvimentu, i nia(Mauk Moruk) mós besik tinan hitu iha ai-lara, nia hatene saida mak pás, saida mak importansia pás ba ita nia nasaun”.

Hafoin remata vizita Quartel F-FDTL, no iha nia intervista ho imprensa sira, Xefe Estadu realsa liútan katak, “Xefe Estadu husu para Mauk Moruk tenke fila intrega an lalais, Mauk tenke kontribui ba estabilidade nasaun nian, estabilidade politika sosial, seguransa nasaun ne’e sagradau. Mauk Moruk tinan hitu ka sia iha ai-lara, nia hatene saida mak pás, pás ne’e hanesan osan-mean nia persija, nasaun persija i ita hotu persija, tanba ne’e ha’u husu nia mai lalais”.

Xefe Estadu mos hatutan hodi dehan katak, Timor-Oan ne’ebé di’ak tenke fó nia kontribuisaun ba estabilidade nasaun nia. Tamba, agora tempu ona atu hanoin ba oin la’os hateke beibeik fali ba kotuk. “Ita hakarak atu ba oin ka ba kotuk? povu hakarak ba oin, problema iha ai-laran husik hela ona iha ai-laran. Prezidente Repúblika laíha tempu atu hanoin ba kotuk, tanba prezidente preokupa ba jovem sira ne’eb’e serbisu laíha, oan sira ne’ebé la ba eskola, uma ladi’ak, bee moos laíha, estrada laíha”.