Dili, 25 Maiu 2015S.E. Prezidente Repúblika, Taur Matan Ruak, halo apelu atu foin-sa’e sira tenke iha obrigasaun atu sai hanesan dínamu ba dezenvolvimentu nasaun nian. Tanba, nasaun ne’e atu ba oin presiza partisipasaun ema hotu nian, liuliu foin-sa’e sira. Mas, foin-sa’e sira presiza duni atu iha espíritu kriativu no vontade di’ak atu fó kontribuisaun.

“Ita-nia nasaun iha problema boot ida. Ita-nia problema maka, oinsá atu tau matan ba joven sira, oinsá maka ita integra joven sira-ne’e iha sistema edukasaun formál no la formál, no oinsá maka ita enkuadra sira iha esforsu nasaun nian atu halo dezenvolvimentu ba ita-nia nasaun hodi emprega no hetan serbisu ba ita-nia oan sira. Ne’e dezafiu boot, tanba ne’e joven sira tenke iha obrigasaun no tenke sai hanesan dínamu ba dezenvolvimentu nasaun nian, para ida-ne’e espíritu kriativu no vontade hodi fó imi-nia kontribuisaun, ne’e tenke maka’as liu”, Xefe Estadu hato’o lia-menon ne’e ba foin-sa’e iha sentru kursu inglés SOLS, iha suku Cribas, postu administrativu Manatuto Vila, munisípiu Manatuto, sábadu semana kotuk.

Aproveita biban ida-ne’e, Xefe Estadu husu ba foin-sa’e sira atu iha fiar an, iha karakter no iha esperansa. Tanba, ho buat tolu ne’e maka bele lori foin-sa’e sira bá hetan futuru ne’ebé di’ak. Hafoin ida-ne’e, husu mós atu foin-sa’e sira buka hatutan luta funu-na’in sira-nian iha períodu/tempu ukun-an ida-ne’e ho espíritu kriatividade no vontade. Tanba, la’ós hotu-hotu tenke sai funsionáriu públiku maka dezenvolve Timor-Leste.

“Hanesan Prezidente Repúblika ha’u fiar imi-nia futuru sei sai di’ak liu ami-nian. Kuandu Nasaun di’ak ita-nia vida di’ak, i ita-nia vida di’ak nasaun di’ak”, hatutan Xefe Estadu.

Hafoin remata vizita estudante kursu inglés SOLS, Xefe Estadu ne’ebé maka Xefe Kaza Sivíl, Fidelis Leite Magalhães, Adjuntu Xefe Kaza Militár no Ministru Turizmu, Francisco Kalbuady Lay akompaña kontinua ba haree atividade negósiu ne’ebé maka inisiativa komunidade nian kona-ba hakiak manu lokál.