S.E. PREZIDENTE REPÚBLIKA HALA’O ENKONTRU HO BLOKU KOLIGASAUN NO PARTIDU OPOZISAUN

by Mídia PR Posted on

Dili, 04 Fevereiru 2015 – S.E. Prezidente Repúblika Taur Matan Ruak simu partidu sira-ne’ebé halibur iha Bloku Koligasaun hanesan CNRT, PD no Frente Mudansa iha tersa-feira ne’e, no iha kuarta-feira ne’e kontinua enkontru ho partidu opozisaun Fretilin, hodi husu lideransa partidu hirak-ne’e nia hanoin kona-ba planu remodelasaun no rezignasaun Primeiru Ministru Kay Rala Xanana Gusmão nian iha Palásiu Prezidensiál Nicolau Lobato.

Iha reuniaun dala uluk ho partidu polítiku sira-ne’ebé tama iha Bloku Governu Koligasaun iha tersa-feira semana ne’e ho kompozisaun reprezentante partidu polítiku no reprezentante sira hanesan tuirmai:

– Partidu Conselho Nacional de Resistência Timorense, reprezenta husi nia Sekretáriu Jerál, Sr. Deonisio Babo, no reprezentante CPN, Sr. Francisco Kalbuady.

– Partidu Demokrátiku, reprezenta husi Prezidente, Sr. Fernando Lasama de Araujo, no Sekretáriu Jerál, Mariano Asanami Sabino, no

– Frente Mudansa, reprezenta husi José Luis Guterres, ho nia Sekretáriu Jerál, Jorge da Conceição Teme.

Iha kuarta-feira, S.E. Prezidente Repúblika hala’o reuniaun ho partidu polítiku, Fretilín, ne’ebé reprezenta husi Prezidente Partidu, Dr. Francisco Guterres Lú Olo, ho nia Sekretáriu Jerál, Dr. Marí Alkatiri.

Hafoin remata enkontru ho Xefe Estadu, Prezidente Partidu PD, Sr. Fernando Lasama de Araujo konfirma katak, sira dehan ba Prezidente Repúblika katak, bloku sei iha remodelasaun no katak sira ko’alia ona ho Primeiru Ministru ho prinsípiu katak, bloku eziste hela. Nia mós hasara tuir katak, Prezidente Repúblika husu ba sira atu ko’alia ba malu nafatin, diskute nafatin, no Prezidente Repúblika hato’o nia disponibilidade nafatin atu rona sira

Hafoin nia reuniaun ho Xefe Estadu, Sekretáriu Jerál Partidu Fretilin, Dr. Marí Alkatiri, subliña ba imprensa katak, Xefe Estadu tenke rona partidu hotu-hotu, liuliu partidu ne’ebé la hola parte iha Governu, hanesan Fretilin, molok atu fó tomada posse ba Governu

Eis Primeiru Ministru Primeiru Governu Konstitusionál ne’e konfirma liután katak, Fretilin sei garante nafatin estabilidade no pás iha Timor-Leste. Maski nune’e, Fretilin fó apoiu ba remodelasaun no husu atu hamenus membru Governu iha reestruturasaun Governu foun mai ne’e, atu nune’e labele fó todan ba mákina Estadu.