Dili, 4 Fevereiru 2015 – S.E. Prezidente Repúblika Taur Matan Ruak kuarta-feira ne’e hato’o sentidu kondolénsias ba família matebian deputadu Mateus de Jesus (56) husi partidu CNRT, ne’ebé hakotu iis iha ospitál Singapura iha loron 30 fulan-Janeiru 2015 hafoin sofre moras iha tempu balun.
Nune’e, Xefe Estadu hato’o nia kondolénsia ba matebian nia família, no husu atu sira iha korajén nafatin iha momentu susar ne’e. Timor-Leste lakon Timoroan di’ak ida, ne’ebé fó nia kontribuisaun durante luta ba ukun rasik-an, nune’e mós iha tempu ukun-an ida-ne’e, deputadu Mateus de Jesus kontinua fó nafatin nia kontribuisaun ba prosesu harii nasaun-Estadu liuhosi Parlamentu Nasionál.