S.E. PREZIDENTE REPÚBLIKA, TAUR MATAN RUAK, KONTENTE SOBRE VIZITA NO DIÁLOGU KOMUNITÁRIU IHA MUNISÍPIU LAUTEM

by Mídia PR Posted on

Dili, 2 Fevereiru 2015 – S.E. Prezidente Repúblika, Taur Matan Ruak, rezumu nia vizita durante semana ida nia laran, husi 26 – 31 Janeiru hodi konfirma katak, Xefe Estadu sente kontente ho nia vizita traballu no diálogu komunitáriU ne’ebé hahú husi suku Fuiloro, Mupaitine, Cacavei, Leuro, Soru, Home, Bauro no Mehara, no termina iha Tutuala, munisípiu Lautem nian iha sábadu semana kotuk, 31 Janeiru.

Xefe Estadu konfirma katak, preokupasaun barak no oioin maka hato’o ona durante vizita no diálogu iha suku hirak ne’ebé refere, no buat hotu la’o di’ak tebes. Xefe Estadu ne’e hato’o liafuan hirak-ne’e iha pouzada Lautem, postu administrativu Tutuala, molok atu halo viajen fila mai Dili.

Ha’u-nia vizita di’ak hotu, ha’u kontente, liuliu iha semana ida-ne’e nia laran, problemas barak maka komunidade sira aprezenta. Maibé, rezumu jerál, ita bele dehan la’o di’ak, i ha’u-nia objetivu hanesan ba fatin ne’ebé ha’u bá ona, agradese populasaun, husu sira-nia apoiu no partisipasaun. Tanba, kontribuisaun sidadaun sira-nian importante tebetebes ba nasaun, governu mesak labele, Prezidente mesak labele, só ho sira-nia apoiu”, Xefe Estadu hatete.

Hakarak mós informa liután katak, durante semana ida nia laran, komunidade sira hatudu sira-nia entuziazmu atu rona ho atensaun esplikasaun hosi S.E. Prezidente Repúblika. Maibé, membru komunidade iha suku 9 ne’e mós aprezenta preokupasaun hirak ne’ebé maka sira hasoru durante ne’e. Nu’udar ezemplu:

Asuntu Veteranu: Veteranu sira reklama sira-nia direitu pensaun ne’ebé la tuir dedikasaun eskluzivu funu iha ai-laran, balun seidauk rejista, no balun nia naran seidauk taka sai.

Asuntu Ezisténsia Iralalaru no Lafaek: Komunidade reklama sobre risku no kazualidade ne’ebé maka akontese beibeik ona, liuliu ba komunidade sira-ne’ebé maka hela besik. Tanba, wainhira udan tau no bee sae, lafaek aproveita sae tuir bee ne’e no ataka membru komunidade sira balun, ka sira-nia animál, hanesan iha suku Muapiteni no suku Mehara. Nune’e, sira husu ba S.E. Prezidente Repúblika atu serbisu hamutuk ho ajénsia governu ne’ebé iha kompeténsia atu buka alternativa atu dezvia tiha bee iha lagoa ne’e ba tasi atu hamenus risku.

Asuntu Dezempregu: falta kampu traballu hodi provoka joven barak emigra ba nasaun seluk atu buka moris.

Asuntu falta Bee Moos: Iha ne’ebé membru komunidade sira dehan katak, bee moos, so funsiona filafali iha loron hirak molok S.E. Prezidente Repúblika nia xegada iha suku hirak ne’ebé maka hala’o diálogu ba.

Hatán ba preokupasaun hirak ne’ebé maka hato’o ne’e, Xefe Estadu mós delega no fó oportunidade ba Sekretária Estadu ba Promosaun Igualdade, Sra. Idelta Rodriguez, reprezentante Sekretáriu Estadu Asuntu Veteranu Antigus Kombatentes Nasionál, no mós administradór munisípiu Lautem, reprezentante diresaun kada Ministériu nian ba munisípiu Lautem atu fó resposta hirak ne’ebé maka tékniku detalladu tebes bazeia ba serbisu hirak ne’ebé sira hala’o membru komunidade sira-ne’ebé maka partisipa.

Públiku no membru komunidade sira ne’ebé maka partisipa iha diálogu komunitáriu iha suku hirak durante loron lima nia laran ne’e mós nota no rona momoos husi S.E. Prezidente Repúblika nia mensajen no resposta xave hirak ne’ebé hato’o, ba kestaun hirak ne’ebé aprezenta atraves liafuan hirak hanesan: “Uluk ho imi fakar raan ba ukun rasik-an, filafali ho imi hisik kosar ba moris di’ak”. Maibé, nia hatutan hodi dehan: “Ita hetan ona ita-nia independénsia, maibé la’ós ita-nia moris di’ak”. Hatutan liután ba nia resposta seluk hirak, Xefe Estadu mós halo apelu importante ida: “Buat importante ne’ebé ita hotu labele lakon maka ita-nia esperansa […]” tanba “[…] hamutuk ita bele, ita sei forte no bele lori Timor-Leste nia dezenvolvimentu ba oin. Mesamesak, ita sei la halakon dezafiu boot ne’ebé iha ita-nia oin.”

Durante vizita traballu no diálogu komunitáriu, Xefe Estadu hetan akompañamentu hosi Sekretária Estadu ba Promosaun Igualdade, Idelta Rodrigues, reprezentante Sekretáriu Estadu ba Kombatentes Nasionál, bainaka espesiál Xefe Estadu nian, administradór postu Hatubelico no Xefe Suku Bikeli, postu administrativu Ataúru, inklui asesór Prezidente Repúblika nian no media nasionál sira.