S.E. PREZIDENTE REPÚBLIKA PARTISIPA IHA ANIVERSÁRIU F-FDTL BA DALA XIV

by Mídia PR Posted on

Dili, 04 Fevereiru 2015 – S.E. Prezidente Repúblika, Taur Matan Ruak, partisipa iha serimónia aniversáriu transferénsia FALINTIL ba F-FDTL ba dala 14 iha Kuartél Jerál F-FDTL, Fatuhada, Dili, iha segunda-feira semana ne’e.

Iha diskursu Xefe Estadu hatete:

“Ita komemora loron Forsa Armadas ninian ne’ebé monu iha loron 2 fulan-Fevereiru tinatinan. Momentu sira hanesan ne’e para ita hahú hanoin momentu difisil ne’ebé ita hahú halo tranzisaun hosi forsa de gerrilla ida ba forsa moderna ida. Hanesan Sr. Jenerál ohin dehan la fasil, karik sira ne’ebé testemuña no akompaña dezenvolvimentu ida-ne’e iha nosaun kona-ba difikuldades saida mak ita hetan iha 2001 bainhira ita harii ita-nia Forsa Armadas.”

Iha biban ne’e, Xefe Estadu ne’ebé maka hanesan Komandante Supremu mós relembra memória, eis-Reprezentante Espesiál ONU nian, Sérgio Vieira de Mello, ne’ebé maka iha tempu UNTAET fó nia kontribuisaun hodi foti desizaun atu harii Forsa Armadas. Xefe Estadu agradese mós ba país sira hanesan Portugál, Nova Zelándia, Austrália, Estadus Unidus no Malázia ba sira-nia apoiu ba F-FDTL dezde inísiu to’o ohin loron.

Xefe Estadu hatutan:

“Hanesan Komandante Supremu Forsa Armadas nian, hanesan mós antigu Xefe Estadu Maiór, ha’u kontente ba dezenvolvimentu Forsa Armadas nian ne’ebé ohin ita hotu haree no testemuña. Estadu hotu-hotu harii Forsa Armadas, Forsa de Seguransa, ne’ebé sai hanesan elementu koezaun para ajuda defende intereses ita-nia nasaun nian hodi hametin liután estabilidade polítiku no sosiál, kondisaun mesak karik ita hakarak dezenvolve ita-nia nasaun no lori bem estar ba ita-nia sidadaun sira, i Timór la sees hosi ida-ne’e.”

Xefe Estadu sente orgullu tebes, tanba maski F-FDTL foin maka halo tinan sanulu-resin-haat, maibé fó ona sira-nia kontribuisaun ba manutensaun ba pás iha misaun Nasoins Unidas nian mezmu ho númeru ne’ebé ki’ik

Ikusliu Xefe Estadu husu ba Governu ne’ebé atu mai atu kontinua tau atensaun ba F-FDTL nu’udar prioridade ida.

Informa mós katak, iha okaziaun ne’ebé hanesan, hala’o mós promosaun diviza ba kapitaun na’in-hitu ne’ebé promove ba Majór, inklui ajudante kampu Prezidente Repúblika nian, Kapitaun Henrique Piedade da Costa “Fitun”, Alferes na’in-tolu ba Kapitaun, Segundu Sarjentu na’in-rua ba Alferes no Kabu na’in-ida ba Segundu Sarjentu.

Antes partisipa serimónia refere, Xefe Estadu aproveita hala’o enkontru kortezia ho Xefe Estadu Maiór Mariña Forsa Armada Indonézia nian (TNI), Almirante Ade Supandi, ne’ebé mak hetan konvite espesiál hosi komandu F-FDTL hanesan reprezentante espesiál Xefe Estadu Maiór Jenerál Forsa Armadas Indonézia nian, atu diskute kona-ba planu kooperasaun F-FDTL no TNI nian ba futuru.

Hola parte iha serimónia aniversáriu ne’e, reprezentante espesiál Xefe Estadu Maiór Jenerál Forsa Armadas Indonézia nian (TNI) Xefe Estadu Maiór Mariña, Almirante Ade Supandi, Komandu Dandrem Kupaun no Dandim Atambua, Xefe Estadu Maiór Jenerál F-FDTL ho nia superiores sira, membrus korpu diplomátiku, membrus Governu no bainaka importante sira seluk.

Fó hanoin de’it katak, Forsa Armadas Libertasaun Nasionál Timor-Leste, FALINTIL, ofisialmente transfere sai Falintil-Forsa Defeza Timor-Leste (F-FDTL) iha loron 2 fulan-Fevereiru 2001.