E. PREZIDENTE REPÚBLIKA IHA DIÁLOGU KOMUNITÁRIU HO KOMUNIDADE SUKU FATUDERE NO UMA UAIN LETEN

by Mídia PR Posted on

Uma Uain Leten- Viqueque, 26 Marsu 2015 – S.E. Prezidente Repúblika Taur Matan Ruak, iha kinta-feira ne’e, hala’o diálogu komunitáriu ba loron dahaat ho komunidade sira iha suku Fatudere. Hafoin, iha lokraik kontinua ho komunidade sira iha suku Uma Uain Leten (Ratahu), postu administrativu Viqueque Vila, munisípiu Viqueque.

Xefe Estadu hahú nia intervensaun inísiu iha diálogu hodi hatete:

“Ha’u mai vizita atu rona, sente imi-nia realidade, no haree imi-nia komportamentu ne’ebé maka hatudu iha tempu funu, iha ne’ebé ita hamutuk luta ba ukun rasik-an no konsege hetan ona. Maibé, durante Ukun-An, imi-nia komportamentu sei nafatin ka lae? Tanba komportamentu maka bele kontribui ba dezenvolvimentu nasionál.”

Xefe Estadu mós husu ba Fatudere-oan tomak, atu labele lakon esperansa ba futuru, no husu atu serbisu hamutuk hanesan autoridades lokál atu bele kontribui ba dezenvolvimentu iha suku laran.

Wainhira tama iha sesaun husu no hatán nian, komunidade sira hato’o sira-nia preokupasaun sobre rekolla restus mortais ne’ebé mate iha ai-laran, udan-been menus halo sira-nia kolleita falla, hadi’ak kondisaun estrada ne’ebé liga Viqueque Vila ba postu administrativu Uatolari, sala eskola ensinu báziku la to’o, inklui problema reál sira seluk.

Wainhira hatán sobre kestaun restus mortais, Xefe Estadu husu ba komunidade sira atu buka responsavel no autoridade lokál ne’ebé besik atu koordena malu oinsá maka atu bele rekolla restus mortais. Maibé, Xefe Estadu mós fó hanoin ba sira katak, restus mortais ne’ebé rekolla ona nu’udar ezemplu iha Uatolari, Quelicai, Iliomar, Laga no Ainaro to’o oras ne’e seidauk haloot tanba problema ho rai laiha atu konstrui Osuáriu.

Hatán kona-ba estrada Xefe Estadu dehan:

“Imi-nia estrada iha ne’e di’ak tebes, kuandu kompara ho ita-nia maluk sira seluk nian tun ba Turiscai, Ainaro, sira-nia suku estrada laiha, ha’u até la’o to’o toba tuir dalan maka ba vizita sira. Imi-nia ne’e sei di’ak, so rai-rahun de’it maka iha impaktu ladi’ak ba saúde.”

Wainhira hala’o diálogu iha suku Uma Uain Leten, iha sesaun husu no hatán komunidade sira levanta kestoins no preokupasoins lubuk ida ba Xefe Estadu, hanesan, laiha bee moos, problema veteranus (hanesan inventa dadus), ema ne’ebé serbisu ba governu indonéziu mas hetan rekoñesimentu hosi Estadu, komunidade husu atu loke estrada ba aldeia ne’ebé dook hosi estrada boot, halakon lei pensaun vitalísia ne’ebé fó todan ba Estadu, uma MDG’s ne’ebé tau estaka ona iha 2013 maibé to’o agora la realiza, no preokupasoins importante sira seluk.

Wainhira ko’alia kona-ba problema veteranus ne’ebé sempre levanta beibeik iha diálogu, Xefe Estadu hatán katak:

“Veteranu sira, mai ita hamutuk rezolve tiha. Ha’u promete antes ha’u ho maun Xanana mate ami hakarak problema veteranu tenke rezolve. So rezolve se ita iha konxiénsia, unidade, umildade no haree ba ita-nian, la’ós ha’u-nian. Prezidente Repúblika la fase liman, Prezidente Repúblika hakarak ita rezolve tiha problema ne’e.”

Hatán sobre lei pensaun vitalísia, Xefe Estadu, hatete iha ona konkordánsia entre lideres bankada hirak iha Parlamentu Nasionál atu halo revizaun ba lei ne’ebé refere. Xefe Estadu mós kontinua fó hanoin pontu prinsipál tolu ba komunidade sira iha suku Uma Wain Kraik atu tau matan ba ekonomia família nian, investe oan ba edukasaun no kuida saúde família sira-nian nu’udar xave atu família sira hetan moris di’ak

Durante diálogu ho komunidade iha suku rua, Xefe Estadu mós fó oportunidade ba diretór husi reprezentante autoridade hanesan, diretór sira iha setór edukasaun, saúde, agrikultura no komandante PNTL ba munisípiu Viqueque atu hatán asuntu hirak iha setór dezenvolvimentu nu’udar refere.

Informa mós katak, iha diálogu ho komunidade iha suku Uma Wain Kraik (Ratahu), komunidade lokál hetan oportunidade partikulár ida, iha ne’ebé Xefe Estadu partisipa mós hamutuk ho sira atu hatún bandeira RDTL iha sentru suku ne’ebé refere.