PREZIDENTE REPÚBLIKA HI’IT MAKA ATU SALVA VIDA ASIDENTE IHA BEHEDAN

by Mídia PR Posted on

Dili, 28 Marsu 2015 –S.E. Prezidente Repúblika Taur Matan Ruak iha Sábadu, koinsidentemente to’o aserta loos asidente karreta kamioneta fuso ho númeru Polísia 54-594 baku fila iha area Behedan, postu administrative Laclo, munisípiu Manatutu wainhira Xefe Estadu fila ho nia komitiva hosi vizita traballu iha munisípiu Viqueque.

Husu ema na’in-8 ne’ebé maka sai vítima iha asidente ne’ebé maka akontese, mane na’in-2 kanek todan, no envolve mós labarik-feto ki’ik na’in-3 inklui ho sira-nia mae.

Asidente refere, akontese maizumenus tuku rua resin oras Timor-Leste, no hafoin minutu 5, Xefe Estadu mosu kedan iha fatin akontesimentu.Haree ba asidente ne’e, Xefe Estadu fó kedan orientasaun atu hapara nia karreta, no nia mós tun no bá kedan fatin asidente nian diretamente atu haree kondisaun vítima sira-ne’ebé maka envolve nu’udar refere.

Hafoin, Xefe Estadu fó kedan mós orientasaun ba nia seguransa no membru komitiva sira seluk atu ajuda hi’it vítima kanek ne’ebé monu sai husi karreta ba rai-naruk ne’ebé ho nia kle’an liu metru 6.Imediatamente, Prezidente Repúblika mós orienta atu halo lailais kedan pedidu ba Sentru Saúde Manatutu atu fornese lailais ambulánsia ida tan. Tanba, ambulánsia vizita traballu nian la sufisiente atu lorivítima sira hotu.

“Bolu lailais ba ambulánsia.Hatún maka iha ambulánsia laran, lalaiiis, lalaiiis,lori maka mai. Ida-ne’e tau maka mak di’ak, labele ko’us tanba nia kondisaun todan uitoan”, Xefe Estadu espontaneamente orienta nia seguransa pesoál sira no membru delegasaun sira seluk.

Joven ida no mane kaben-na’in ida sofre pankada todan tebes, hafoin sira ida-idak baku hirus-matan ba ai-daak hun boot, no ba fatuk, inklui mós pankada balun ne’ebé maka labarik ki’ik sira sofre hafoin katík sai husi kamioneta antigu ne’ebé sira sa’e iha Ossu.

Sorte di’ak ida ba vítima sira maka katak, hafoin Xefe Estadu ho nia seguransa, asesores no tékniku sira ko’us sai hotu tiha vítima sira hosi rai-naruk sa’e mai estrada-ibun, ekipa médiku Xefe Estadu nian mós prontu kedan atu oferese primeiru-sokorru ba molok halo evakuasaun vítima sira mai Ospitál Nasionál Guido Valadares.

Hafoin hetan tratamentu husi médiku S. E. Prezidente Repúblika nian liu minutu 40, ambulánsia ne’ebé maka Xefe Estadu husu urjentemente husi Munisípiu Manatutu mós to’o duni mai no prosesu evakuasaun mós hala’o daudauk kedan.

Bazeia ba observasaun ikus, oras ne’e daudaun, vítima sira hotu hala’o hela tratamentu no observasaun intensivu iha Ospitál Nasionál Guido Valadares.