S.E. PREZIDENTE REPÚBLIKA HALA’O DIÁLOGU KOMUNITÁRIU IKUS NIAN IHA SUKU UMA KIIK NO CARAU-BALO

by Mídia PR Posted on

 CarauBalo-Viqueque, 30 Marsu 2015 – S.E. Prezidente Repúblika, Taur Matan Ruak, iha sesta-feira semana kotuk hala’o diálogu komunitáriu ba loron dalimak ka dala ikus nian ho komunidade sira iha suku Uma Kiik nian iha dadeer, no kontinua ho parte lokraik nian ho komunidade sira iha suku Carau-Balo nian, postu administrativu Viqueque Vila, munisípiu Viqueque.

Durante diálogu iha suku Uma Ki’ik no Carau-Balo Xefe Estadu kontinua reitera nia hanoin ba komunidade sira iha suku rua refere kona-ba objetivu Xefe Estadu nia vizita hosi suku ba suku seluk atu agradese ba komunidade sira-nia partisipasaun kontribuisaun iha funu atu halo Timor-Leste sai nasaun independente ida, haree no rona situasaun reál hirak ne’ebé komunidade sira hasoru, sente rasik komunidade sira-nia moris no halo komparasaun hodi nune’e transmite tutan ba Governu hodi buka solusaun ba problema hirak-ne’ebé maka sira enfrenta.

“Ha’u mai haree no rona imi, husu imi se imi sei prontu ka lae ita atu la’o ba oin, ka ita ukun an ona tuur de’it buat hotu mosu de’it. Ita-nia komportamentu, ita-nia disponibilidade, ita-nia preparasaun, ne’e kondisaun no fatór ida atu tetu ita prontu ka lae atu la’o ba oin tuir ita ida-idak nia kbiit atu hetan moris di’ak”, dehan Xefe Estadu.

Kestoins no preokupasoins ne’ebé komunidade hosi suku rua levanta ba Xefe Estadu kuaze atu hanesan, ezemplu: problema veteranus nian kona-ba ema ne’ebé partisipa funu kleur ne’ebé maski iha ona rekoñesimentu maibé grau tun; halo kria ona konsellu veteranus atu nune’e bele rezolve lailais problema veteranus; programa subsídiu ba veteranus bele hamosu konflitu tanba balun simu balun la simu; husu loke estrada ba aldeia ka knua ne’ebé dook hosi estrada boot atu fasilita komunidade balun hakarak filafali bá hela iha knua; merenda eskolár paradu ona fulan tolu; disputa rai nian; inan-aman baku profesores iha sala laran; no preokupasaun reál seluk hirak.

Hatán ba problema merenda eskolár, Xefe Estadu hatán katak:

Merenda eskolár, normalmente ita iha problema se ita dehan labele, se ita seidauk mampu hala’o sasán lojístika kompleksu, di’ak liu lalika. Mas, ita la hanoin ba alternativas. Problema merenda eskolár ne’e ha’u rona dezde ha’u sei Jenerál.”

Ba preokupasaun kona-ba rai nian, Xefe Estadu hatán:

Ita-nia lei ba rai seidauk iha, lei uluk PN aprova lori ba ita-nia maun Prezidente uluk Horta veta tiha. Agora sira tenke diskute filafali hodi lori ba Prezidente, mas Prezidente mós tenke haree lai lei ne’e, se ba interese populasaun Prezidente promulga, mas se lae Prezidente veta. Tanba ne’e husu para Ita-Boot sira, pasiénsia, tanba problema rai ne’e Timór laran tomak i bele sai fatór ba konflitu.”

Kona-ba keixa profesores ida nian ne’ebé dehan katak inan-aman alunus baku profesores iha sala laran, hatán ba ne’e, Xefe Estadu lamenta tebes ba attitude refere:

“Prezidente lamenta tebes ba inan-aman halo presaun ba profesores, ne’e krime públiku. Sé maka komete ne’e tenke bá tribunál. Ita-nia liberdade iha limite, liberdade la’ós iha anarkia, portantu ha’u husu ba señór mestre atu halo keixa formál ba Polísia hodi prosesa kazu ne’e. Ne’e primeira no última vés!”

Ba problema hirak ne’ebé komunidade levanta liga ba serbisu governu nian, Xefe Estadu fó oportunidade ba diretores departamentu hirak ne’ebé akompaña Xefe Estadu durante vizita atu responde ba komunidade sira-nia preokupasaun.

Iha suku Carau-Balo, Xefe Estadu aproveita husu komunidade fó aplauzu ba serbisu médiku sira-nian iha kada suku. Tanba, maski la iha postu saúde no dormitóriu maibé médiku/doutores sira iha enerjia atu hala’o serbisu hodi atende komunidade sira-nia preokupasaun hirak sobre saúde.

Diálogu iha suku Carau-Balo maka hanesan diálogu ikus nian durante semana ida nia laran ne’ebé mak hahú hosi suku Barique, postu administrativu Natarbora, munisípiu Manatutu iha 23 Marsu, no tuir fali bá suku Laline, Dílor, Uma Tolu (postu administrativu Lacluta), Bahalarawa’in, Uma Uain Kraik, Fatudere, Uma Uain Kiik, Uma Kiik (postu administrativu Viqueque Vila).