S.E. PREZIDENTE REPÚBLIKAHALA’O DIÁLOGU HO KOMUNIDADE SUKU BAHALARAWA’IN/BIKARIN NO UMA UAIN KRAIK

by Mídia PR Posted on

Laline, Lacluta, 25 Marsu 2015 – S.E. Prezidente Repúblika, Taur Matan Ruak, iha kuarta-feira ne’e hala’o diálogu komunitáriu ba loron datoluk ho komunidade sira iha suku Bahalarawa’in (Bikarin). No, iha lokraik kontinua diálogu ho komunidade sira iha suku Uma Uain Kraik (Luga-Assa), postu administrativu Viqueque Villa, munisípiu Viqueque.

Iha nia intervensaun, Xefe Estadu dehan katak,iha tempu pasadu, suku Bahalarawa’inka Luga-Assasai fatin ba serbisu ba komunidade sira.Tanbane’e, Xefe Estadu husu atu se bele karik, Bahalarawa’in bele filafali sai kampu serbisu ba ema hosi fatin seluk hanesan iha tempu portugés.

Xefe Estadu mós fó tebetebes atu se bele karik husu ba komunidade iha suku ne’ebé refere atu organiza an, ko’alia ba malu, fiar no ba autoridade lokál atu hatán ba dezafiu hirak ne’ebé maka sira hasoru daudaun oras ne’e.

Iha sesaun husu no hatán, komunidade sira hato’o keixa ba Xefe Estadu kona-ba sira nia problema iha suku laran:autoridades suku fahe uma MDG’S la tuir kritériu hodifahe fali ba família ne’ebé foin fila hosi Kupaun, problema artes marsiais ne’ebé sempre provoka maluhodi halo povu moris lahakmatek, kondisaun hirak-ne’ebé ladún kompletu ba médiku sira.

Hatán ba keixa ne’ebé hato’o, Xefe Estadu dehan:

“Problema iha uma laran, imi makatenke rezolve uluk no labele depende ba ema seluk.Ha’u fiar katak amu-liurai, katuas adat sira, administradór postu administrativu, munisípiu sira, imipresiza tuur hamutuk hodi ultrapasa problema hirak-ne’e.Ha’u husu imi tenkeiha unidade, tanba seitala’o ida-idak nian, la rona malu, entaun ita la bá oin.Esperiénsia hatudu tiha ona iha funu laran,hamutuk ita manán, se ita la hamutuk ita la manán. Dala ida tan,ha’u fiar katak, na’i liurai, katuas adat sira, imi sei rezolve preokupasoins hirak-ne’e.”

Molok termina diálogu, Xefe Estadu bolu atensaun ba autoridades no komunidade suku Bahalarawa’in nian atu serbisu hamutuk hodi lori suku ba oin, tanba serbisu hamutuk maka segredu ba susesu:

“Atu lori suku Bahalarawa’in ne’e ba oin ka ba kotuk ne’e iha imi Bahalarawa’in tomak nia liman, la’ós iha fali ema seluk nia liman”, dehan Xefe Estadu.

Wainhira hala’o fali diálogu iha suku Uma Uain Kraik (Luga-Assa), Xefe Estadu elojia tebes ba inisiativa veteranu sira-nian ne’ebé organiza anhodi kontribui osan atu selu profesór voluntáriu sira no nesesidade eskola nian iha suku laran.

“Primeiru lugar ha’u elojia tebes ba imi-nia inisiativa ne’e, mas ha’u husu atu imi serbisu hamutuk ho Ministériu Edukasaun”,elojia Xefe Estadu.

Xefe Estadu mós kontente no agradese tebes komportamentu sidadaun suku Luga-Assanian ne’ebé komprende ona prosesu regras no jogu demokrasia.

Hanesan iha suku seluk hirak ne’ebé Xefe Estadu liu ona, iha suku rua ne’ebé refere, Xefe Estadu kontinua salienta nia mensajen prinsipál tolu ba komunidade sira atu banati tuir hanesan; tau matan ba ekonomia família nian, investe iha oan nia edukasaun no kuidadu saúde sira-nia família nian. No, Xefe Estadu repete katak, so ho buat tolu ne’e la’o di’ak maka bele muda família ida nian kondisaun, liuliu família nia kondisaun moris iha futuru.

Xefe Estadu mós repete fila fali resposta hirak ne’ebé maka nia hato’o ona iha suku seluk hirak uluk wainhira hatán ba keixa hirak ne’ebé maka hanesan, nu’udar ezemplu, problema irrigasaun, falta bee moos, estrada ne’ebé maka iha impaktu aat ba saúde, tanba taka de’it ho rai-mutin, problema veteranus sobre valorizasaun tuir funsaun ne’ebé sira hala’o durante períodu revolusaun, inventa dadus partisipasaun funu, loke estrada ba aldeia hirak-ne’ebé dook husi estrada boot, no preokupasaun seluk tan.

Informa mós katak iha suku rua ne’ebé refere, S.E. Prezidente Repúblika, Taur Matan Ruak, mós la haluha atu subliña pontu prinsipál balun ba partisipante sira iha diálogu suku rua nian hodi dehan hato’o pontu hirak tuirmai: asuntu veteranu la’ós Prezidente Repúblika no Governu nian de’it. Maibé, problema Timor-Leste tomak nian, tanba iha ligasaun ba “unidade no osan”.

Xefe Estadu mós husu ba partisipante sira iha diálogu hodi dehan katak:

Ita hotu tenke tau esforsu hamutuk ba Timor-Leste. No, presiza mós hanoin katak, partidu polítiku la fóhan ita, maibé klaru katak sempre haburas prosesu demokrasia.”

Antes remata no fila ba deskansa atu prepara ba atividade iha diálogu tuirmai, Xefe Estadu mós aproveita okaziaun hodi aprezenta prémiu ba ekipa hirak ne’ebé maka manán jogu hamutuk ho reprezentante autoridade lokál sira-ne’ebé hetan konvite mós atu entrega prémiu.

Ikus mai, iha kinta-feira, S.E. Prezidente Repúblika, Taur Matan Ruak, ho komitiva tomak sei kontinua atu hala’o diálogu iha suku rua seluk bazeia ba planu ne’ebé prepara ona.