LIAFUAN HOSI SUA EXELÉNSIA PREZIDENTE TAUR MATAN RUAK IHA SERIMÓNIA HAKOI MATE-ISIN DON ALBERTO RICARDO DA SILVA, BISPU EMÉRITU DIOSEZE DILI NIAN

by Mídia PR Posted on

Dili, 6 Abríl, 2015

Reverendísmu Bispu Don. Basilio do Nascimento, exélensia

Reverendísimu Don.Norberto Amaral, Bispu Dioseze Maliana

Reverendeu reprezentante Vatikanu nian

Señór Prezidente Parlamentu Nasional ho nia espoza

Señór Primeiru Ministru ho nia espoza

Señór Prezidente Tribunal rekursu ho nia espoza

Exelénsias autoridades sivís, relizioja no militáres

Familia suadozu matebian Don. Alberto nian

Doben sarani sira,

Hanesan nasaun soberanu ita akompaña ba dala uluk loron ikus Bispu Timor-oan ida nian, Bispu titular Dioseze ida iha ita nia rain.

Ita-nia rain ohin hafalun án ho matan wen no trsiteza.

Hanesan Xefe do Estadu sente onradu tebes hodi hato’o liafuan ruma iha momentu ne’ebé ita halibur án iha isin Don. Alberto Ricrado da Silva nian.

Don. Alberto hahú nia estudu iha ita-nia rain, mais hatutan filafali iha Macau no Portugal.

Atu hakle’an liután nia matenek estuda mós iha Roma.

Bainhira filafali mai iha ita-nia rain asumi responsabilidade oioin no hala’o misaun ne’ebé simu ho dedikasaun seriadade no determinasaun tomak, maibe prova boot seidauk to’o, prova ne’e mak nia hatudu iha momentu ne’ebé difisil ita-nia nasaun nian, iha tempu okupasaun nian.

Vertude, dedikasaun no seriadade persija mós aumenta ho korajen no domin ba ita-nia rain. Iha 1977, funu manas liután neineik ba neineik funu maluk sira harahun ita-nia baze subar fatin nian. To’o 1979 ita-nia derotas estratéjiku sai realidade ida, hosi ne’e mai oin, saserdote sira indetifika án ho ita-nia povu nia sofrementu, no komesa denunsia hahalok at funu maluk sira-nian ba rai liur.

Don. Albreto entaun Vigariu Jeral desididu tebes atu fó án ba buat ne’ebé nia fiar no nia hanoin patriótiku no mós ba mehi lulik ita-nia povu no ita-nia nasaun nian ba ukun rasik an.

Fiar iha futuru ita nia-rain nian Don. Alberto hatudu nia kapasidade organizador no mobilizador ne’ebé la sukat, prezensa ninian iha kampamentu jovem sira nian, i ninia serbisu ho jovem sira, fila nia sai modelu no ijemplu ida atu tuir.

Hosi nia koerensia nia determinasaun Don.Alberto manan konfiansa hosi jovem sira i ho nia sira serbisu.

Igreja Motael nakfilak án ba fatin serbisu no subar hodi halibur jovem sira ne’ebé okupante sira duni no buka. Dala ida tan hosi masakre Santa Kruz marka momentu importante ida iha ita-nia istoria, Don. Alberto sai presiguido no interogadu.

Don. Alberto matenek duni, bainhitra serbisu no fiar iha jovem sira ejiji sira atu aprende liután hodi fó domin ba ita-nia rain.

Esforsu Don. Alberto nian la saugati, buat ne’ebé hosi Santa Kruz no sira seluk ne’ebé tuir mai hatudu momoos saida mak nia no ita mehi hela ba ita-nia rain.

Don. Alberto fiar iha ita-nia futuru ita-nia rain ninian i hateten katak buat hotu tenke liu hosi i oinsa mak jovem sira simu no rai iha fuan no laran valores hotu-hotu ne’ebé aprende. Nia la sala ninia los duni.

Rigorozu ba nia án rasik, koerente no buat hotu ne’ebé nia halo Don. Alberto Ricardo sempre hatais ninia batina hodi hatudu katak nia amululik, hahalok ida ne’e halo okupantes sira la hakmatek.

Exelénsias

Doben sarani sira,

Hosi ninia kualidade, hosi nia marka esperansa no pás, vontade ne’ebé nia hatudu hodi hada’et ba ita hotu nomoos hanesan patriota no heroi, ha’u hakarak hakruuk ba ninia memoria ho fiar tomak katak, Don. Alberto nia isin mak mate maibe ninia memoria sei horik ho ita to’o rohan laek.

Exélensias,

Ho atensaun tomak ha’u simu pedidu Sr. Primeiru Ministru nian no ho onra boot mak ha’u kondekora ita-nia aman no heroi ba títulu ónorifiku Ordem Nicolau Lobato. Deskansa em paz.