Prezidente-da-Repúblika enkontru ho PD no KHUNTO ba Formasaun Governu

by Mídia PR Posted on

Palásiu Prezidente Nicolau Lobato, loron-4 fulan-Agostu, Prezidente-da-Repúblika Francisco Guterres Lú Olo kontinua halo dialogu ho partidu polítiku ne’ebé hetan asentu parlamentár. Prezidente-da-Repúblika ohin loron hasoru lider husi PD no KHUNTO ko’alia kona-ba formasaun VII governu konstituisionál.

Iha sorumutuk ne’e, Prezidente-da-Repúblika hato’o katak partidu mais votadu iha marjin ne’ebé ki’ik tebes ho partidu daruak hodi hetan de’it maioria simples. Tanba ne’e Prezidente-da-Repúblika husu partidu mais votadu bele iha estabilidade governativa iha tinan-lima nia laran atu halo kontaktu no dialogu ho partidu polítiku sira seluk ne’ebé hetan asentu parlamentar CNRT, PLP, PD no KHUNTO atu forma governu.

Prezidente Partido Democrático Mariano Asanami Sabino no Vise Prezidente Adriano Nascimento iha sorumutu ho Prezidente-da-Repúblika manifesta sira-nia vontade tomak atu bele garante paz no estabilidade no sei koopera nafatin atu iha governu ida ne’ebé estavel iha tinan-lima nia laran. Partido Democrático iha nia mekanizmu atu konsulta no hatudu sira-nia vontade atu halo dialogu.

Prezidente KHUNTO Armanda Berta dos Santos bainhira rona desizaun partidu mais votadu sei halo dialogu ho partidu ho asentu parlamentár hato’o sira-nia vontade kontinua kontribui ba pás no estabilidade no governu ida ne’ebé bele dura iha tinan-lima mai.

Xefe-de-Estadu informa katak partidu ne’ebé hetan votu barak liu sei halo dialogu ho partidu polítiku sira seluk atu bele halo ajustamentu no aliñamentu politiku kona-ba programa governasaun. Partido Democrático no KHUNTO prontu atu rona no hato’o sira-nia hanoin relasiona ho formasaun VII Governu Konstitusionál.

Iha enkontru ne’e, Prezidente-da-Repúblika enkoraja liután jerasaun foun sira atu halo interasaun ho jerasaun ne’ebé iha esperiénsia no valor atu bele iha transmisaun husi aspetu ne’e.

Enkontru ne’e nu’udar kontinuasaun husi kontaku ne’ebé Prezidente-da-Repúblika halo uluk tiha ona horseik ho FRETILIN, CNRT no PLP hodi ko’alia kona-ba formasaun VII Governu Konstitusionál.