Prezidente-da- Repúblika hasoru malu ho Prokurador Jerál

by Mídia PR Posted on

 

Palásiu Prezidente Nicolau Lobato, loron-7 fulan Agostu, Prezidente-da- Repúblika Francisco Guterres Lú Olo hala’o reniaun mensál ho Prokuradór Jerál-da-Repúblika Dr. Jose da Costa Ximenes ko’alia kona-ba serbisu prokuradória hanesan ezekusaun ba kondenadu Eis Ministru Edukasaun João Cancio Freitas ba kazu partisipasaun ekonomia no negósiu iha loron-26 Jullu ne’ebé agora iha prizaun Gleno, Ermera .

Prokuradór Jeral-da-Repúblika informa mós kazu hanesan komete husi kondenadu sira, Eis Sekretáriu Estadu ba Obrás Públika Domingos Caero no funsionáriu públiku ida iha Obras Públika Augostu Ingles ne’ebé tribunal foti desizaun kastigu iha prizaun tinan-tolu-fulan-neen.

Depoisde rona sasin balun, iha loron-11 fulan-Agostu tribunál sei foti desizaun ba kazu sidadaun Portugés. Prokuradór mós informa kazu balun hanesan konstrusaun Ospitál Referal Baucau no investigasaun PNTL ba krime ne’ebé akontese iha Seisal Baucau.

Relasiona ho serbisu ne’e, Prezidente-da-Repúblika enkoraja Prokuradór Jerál-da-Repúblika katak desde asumi nia kargu fó prioridade ba kazu Korupsaun tanba ne’e nia husu atu nafatin ho pozisaun firme hodi prosesa krime sira ho di’ak liutan ba oin. Xefe-de-Estadu husu ba Prokuradór Jerál katak Ministériu Públiku tenki hamrik iha prinsípiu igualdade hodi aplika lei hanesan ba sidadaun hotu.