Prezidente-da-Repúblika husu Partidu Polítiku Promove Dialogu ba Formasaun Governu

by Mídia PR Posted on

 

Palásiu Prezidente Nicolau Lobato, loron-3 fulan-Agostu, Prezidente-da-Repúblika Francisco Guterres Lú Olo ohin loron bolu partidu polítiku ne’ebé hetan asentu parlamentár, hahú husi ida ne’ebé hetan votu barak liu FRETILIN, CNRT, PLP, PD no KHUNTO ko’alia kona-ba formasaun VII governu konstituisionál.

Iha sorumutuk hamutuk ho partidu mais votadu, Prezidente-da-Repúblika hato’o ba FRETILIN katak votu ne’ebé hetan hatudu iha marjin ne’ebé ki’ik tebes ho partidu daruak CNRT, hodi hetan de’it maioria simples. Tanba ne’e Prezidente-da-Repúblika husu ba Sekretáriu Jerál FRETILIN Mari Alkatiri, Vise Prezidente Francisco Branco no Sekretáriu Adjuntu Jose Reis nu’udar partidu mais votadu atu bele iha estabilidade governativa iha tinan-lima nia laran halo kontaktu no dialogu ho partidu polítiku sira seluk ne’ebé hetan asentu parlamentar CNRT, PLP, PD no KHUNTO.

Nu’udar partidu polítiku mais votadu, FRETILIN simu Prezidente-da-Repúblika nia desizaun polítika no kompromete atu halo kontaktu no dialogu ho partidu polítiku hotu-hotu, primeiru ho partidu CNRT ho nia lider Xanana Gusmão iha tempu badak nia laran hanesan mós ho PLP, PD no KHUNTO.

Iha nia sorumutu hamutuk Sekretáriu Jerál CNRT Francisco Kalbuady no Primeiru Vise Prezidente Virgilio Smith hato’o ba Prezidente-da-Repúblika katak sei apoiu estabilidade governativa no estabilidade nasionál. Desizaun kona-ba CNRT nia partisipasaun polítika iha formasaun VII Governu Konstitusionál sei determina iha konferénsia ne’ebé sei hala’o iha fim-da-semana ne’e. Partidu CNRT simu desizaun Prezidente-da-Repúblika atu simu Sekretáriu Jerál FRETILIN no nia ekipa hanesan partidu mais votadu iha tempu oin atu ko’alia kona-ba formasaun VII governu konstitusionál hafoin konferénsia partidu remata.

Prezidente Partidu Libertasaun Popular Taur Matan Ruak ho nia vise Fidelis Magalhaes iha nia sorumutuk ho Prezidente-da-Repúblika dispoin nia vontade tomak hodi tuir desizaun ne’ebé Xefe-de-Estadu foti no prontu atu kolabora.

Husi Prezidente-da-Repúblika nia sorumutuk ho FRETILIN, CNRT no PLP ohin, partidu polítiku hotu-hotu sei promove dialogu ba formasaun VII Governu Konstitusionál.

Enkontru Prezidente-da Repúblika ho PD no KHUNTO sei hala’o aban, loron-4 fulan Agostu.