Xefe-de-estadu rona medida hosi governu kona-ba preokupasaun estudante Timoroan iha Kabu-Verde.

by Mídia PR Posted on

Prezidente-da-Repúblika Hala’o Enkontru Regular ho Primeiru Ministru

Palásiu Prezidente Nicolau Lobato, loron-10 fulan-agostu, Prezidente-da-Repúblika Francisco Guterres Lú Olo, hala’o enkontru regular ho Primeiru Ministru Rui Maria de Araújo hodi ko’alia kona-ba serbisu governu-de-jestaun ne’ebé sei la’o hela.

Prezidente-da-repúblika rona mós medida sira hosi governu nian kona-ba preokupasaun xefe-de-estadu nian iha semana hirak ba kotuk relasiona ho estudante Timoroan iha Kabu-Verde. Ho problema ne’e, governu haruka tiha ona ekipa konjunta ida entre Ministériu Edukasaun ho Fundu Dezenvolvementu Kapitál Humanu ba halo apuramentu ba faktu sira, no iha duni faktus lubuk ida ne’ebé mak sei relata fali ba Prezidente-da-Repúblika.

Tanba ne’e, agora dadaun Ministériu Edukasaun serbisu hamutuk ho Ministériu Negosiu Estranjeirus atu haruka asistente adidu ida ba Kabu-Verde, hodi halo akompañamentu diretu ho estudante sira no sei hein estudante sira rasik foti desizaun kona-ba saida mak sira hakarak.

Tanba tuir kontratu molok simu bolsa estudu ba, hatete klaramente bainhira la konsege akaba, estudante sira tenke fila mai Timor, sé atu transfere ba Universidade sira tenke to’o mai ona Timor mak tuir konkursu hodi ba fali eskola iha fatin seluk.

Alende ne’e, Prezidente-da-Repúblika ko’alia nia viajen iha fulan-Setembru reprezenta estadu Timor Leste hodi partisipa iha Asembleia Jerál Nasoens Unidas iha Estadus Unidus.

Iha biban ne’e, Prezidente-da-Repúblika ko’alia mós selebrasaun loron 20-agostu Aniversariu FALINTIL nian, tanba Prezidente-da-Repúblika mak hanesan Komandante Supremu F-FDTL, tanba ne’e xefe-de-estadu rasik sei prezidi serimónia komemorasaun ne’e. Prezidente-da-Repúblika husu ba Governu atu fasilita banda muzika ne’ebé mak foin dadaun lansa múzika rezisténsia ninian atu partisipa iha selebrasaun loron FALINTIL.

Iha enkontru ne’e xefe-de-estadu simu dokumentu Retratu VI Governu no CD gravasaun múzika rezisténsia ninian hosi Primeiru Ministru.