Prezidente-da-Repúblika Rona Relata Dezenvolvimentu Area Sosiál No Edukasaun Husi Ministru António da Conceição

by Mídia PR Posted on

 

Palásiu Prezidente Nicolau Lobato, loron-8 fulan-Setembru Prezidente Repúblika Francisco Guterres Lú Olo, simu vizita hosi Ministru Koordenador Asuntu Sosiais no Ministru Edukasaun, António da Conceição ho nia ekipa.

Iha sorumutu ne’e, Xefe-du-Estadu rona esplikasaun husi ministru no nia ekipa kona-ba serbisu balu iha Ministériu Solidaridade sosiál hanesan fó apoiu ba unidade óspitalar sira, distribuisaun medikamentus no dezenvolvimentu jerál iha area sosiál.

Prezidente-da-Repúblika sei ko’alia kona-ba asuntu sira ne’e bainhira partisipa iha Asembleia Jerál Nasoens Unidas (ONU), iha domingu-datoluk fulan-Setembru ne’e.

Ba Xefe-du-Estadu, Ministru António da Conceição no nia ekipa mós, relata dezenvolvementu edukasaun iha rai-laran, hanesan programa merenda eskolar, partisipasaun alunus iha eskola no dezempeñu professor sira iha eskola, liuliu kona-ba difikuldade profesór sira atu hanorin ho lian Portugés.

Problema seluk mak ekipa ne’e aprezenta ba Xefe-du-Estadu mak kona-ba orsamantu tinan-tinan ba Ministériu Edukasaun ne’ebé atribui barakliu ba saláriu no vensimentu, envez ba hadi’a kualidade edukasaun.

Prezidente-da- Repúblika rekoñese iha duni problema boot iha lian Portugés, maibé lian ne’e hanesan lian ofisiál no identidade nasaun nian. Tanba ne’e, Prezidente Repúblika husu ba Profesór sira atu esforsu hodi domina lian Portugés, atu nune’e bele fahe siénsia ba estudante sira ho kualidade.

Xefe-du-Estadu mós hatudu nia preukupasaun kona-ba fasilidade infrastrutura edukasaun ne’ebé kontinua sai dezafiu boot ba estadu no kompromete sei hatutan ba VII Governu konstitusionál atu tau atensaun ba kestaun ida ne’e.