Palásiu Prezidente Nicolau Lobato, Loron-18 fulan-Janeiru
Komandu Jerál PNTL Komisáriu Júlio da Costa Hornay no Vise Komando Jerál, Komisáriu Faustino da Costa hala’o reniaun semanál ho Prezidente-da-Repúblika Francisco Guterres Lú Olo.
Iha reniaun semanál ne’e, Julio Hornay informa ba Xefe-de-Estadu kona-ba situasaun seguransa iha rai laran no dezenvolvimentu Instituisaun PNTL nian.
Situasaun seguransa enjerál, tuir komandu Jerál PNTL la’o ho di’ak maske iha aktu krime balu ne’ebé akontese, maibé polísia nafatin ho ninian profesionalismu halo atuasaun ba kazu sira ne’ebé akontese, hanesan kazu violensia doméstika no kazu joven sira ne’ebé baku malu iha fatin balu.
Entretantu, orsamentu ba PNTL sai preokupasaun ba tinan ida ne’e tamba orsamentu duadésimu la sufisiente atu sustenta Instituisaun PNTL tamba orsamentu refere responde de’it ba saláriu vensimentu no bens serbisu.
“Preokuasaun ne’ebé hatoo ba Prezidente kona-ba situasaun orsamentu tamba ita fulan ida ne’e osan duadésimu so responde de’it nesesidade saláriu vensimentu no bens i serbisu, maibé bens i serbisu mós ba ida importante hanesan kombustivél no orsamentu alimentasaun ba membrus. Planu Anúal sira ne’ebé PNTL atu hala’o labele ejekuta tamba orsamentu limitadu”, hatete Julio Hornay
Maske ho difikuldades maibé Julio Hornay hatete PNTL hatudu nafatin ninian prontidaun hodi serbisu ho responsabilidade no neutralidade para asegura estabilidade no pás iha Timor laran tomak.
Mídia PR