Palásiu Prezidensiál Nicolau Lobato, loron-19 fulan-Janeiru tinan-2018.
Prezidente-da-Repúblika Francisco Guterres Lú Olo ohin simu karta kredensiál husi embaixadór sira husi Estadu Unidus Amerika, Portugal no Koreia Sul iha Palásiu Prezidensiál Nicolau Lobato.
Ambaixadóra Estadus Unidus Amerika Kathleen M. Fitzpatrick sei hatutan relasaun diplomátika ne’ebé estabelese tiha ona ho Timor-Leste desde 20 de Maio 2002. Antes restaurasaun independénsia Estadus Unidus Amerika hala’o tiha ona nia misaun hodi akompañ prosesu tranzisaun. Governu Estadus Unidus Amerika halo koperasaun ho Timor-Leste iha area defeza, agrikultura, edukasaun, dezenvolvimentu ekonomia no governasaun demokrátika.
José Pedro Vieira Machado hetan pozisaun diplomátika dahuluk nu’udar ambaixadór. Embaixadór Portugal ba Timor-Leste sei hametin liutan kooperasaun entre nasaun rua ne’ebé iha relasaun sólida ho dimensaun istórika no konsidera nu’udar nasaun maun-alin. Embaixadór Jose Pedro Vieira Machado sei hametin liután kooperasaun bilaterál iha area justisa, defeza, edukasaun, lingua, obras públika no finansas.
Embaixadór Koreia Sul Lee Chin Bum hanesan ho nia antesesór mai husi karrera militár. Korea Sul iha periodu tranzisaun iha administrasaun ONU nia okos haruka unidade militár no estabelese relasaun diplomátika ho Timor-Leste iha 2002. Iha tinan-2009 loke nia embaixada iha Dili. Koperasaun Timor-Leste ho Koreia Sul sai metin liután husi tinan ba tinan iha area juventude, desportu no traballu.