PREZIDENTE-da-REPÚBLIKA SORUMUTU HO CCI-TL

by Mídia PR Posted on

Palásiu Prezidente Nicolau Lobato, loron-15 fulan- Janeiru,

Prezidente-da-Repúblika Francisco Guterres Lú Olo hala’o soromutu ho estrutura Câmara Comércio no Indústria Timor-Leste (CCI-TL), ne’ebé lidera husi nia Prezidente, Oscar Lima.

Iha reniuan ne’e, reprezentante emprezáriu timoroan sira ne’e, hato’o ba Xefe Estadu kona-ba sira-nia preokupasaun relasiona ho atual situasaun polítika ne’ebé afeta mós ba pagamentu husi Governu ba emprezáriu sira ne’ebé tinan-tinan hala’o iha fulan-Novembru no Dezembru nia laran.

Oscar Lima, nu’udar Prezidente Câmara Comércio no Indústria Timor-Leste (CCI-TL), informa ba Xefe-de-Estadu katak tuir dadus CCI-TL nian, iha kolaboradores hamutuk rihun 65 mak serbisu iha empreza privada sira iha Timor laran tomak. Ho impase polítiku ne’ebé oras ne’e iha, obriga empreza barak tenki hapara sira-nia kolaboradores no ida ne’e bele afeta ba aumentu dezempregu no númeru ema-ki’ak iha Timor Leste.

Tanba ne’e, hodi CCI-TL nia naran, Oscar Lima husu ba Xefe-de-Estadu atu bele hala’o nia papel mediadór, hodi foti dezisaun ruma ne’ebé bele rezolve lalais situasaun polítika iha rai laran.

Hatan ba preokupasaun emprezáriu sira-nian ne’e, Xefe-de-Estadu hatete nia kompriende ho lamentasaun emprezariu sira nian, tanba ne’e, ba emprezariu sira ne’e, Xefe-de-Estadu relembra fali esforsu no apelu ne’ebé nia halo ba diálogu no serbisu hamutuk entre polítiku sira, liuliu entre jerasaun tuan no foun, hodi kompromete katak Prezidente-da-Repúblika sei foti duni desizaun iha tempu ne’ebé oportunu.

“Ha’u hakarak hatete ba ita-boot sira katak, klaruke Prezidente-da-Repúblika tenki hola desizaun atu labele lori implikasaun grave ba populasaun sira-nia vida, partikularmente ba ita-boot sira-nia vida ekonómika i vida ekonómika-du-páiz.
Prezidente sei hola desizaun iha tempu ikus. Ne’ebé ita-boot sira hein de’it saida mak Prezidente nia desizaun.
Ha’u husu de’it ita-boot sira fuan-boot atu simu. Polítiku sira mós sei mai hasoru malu ho ha’u, ha’u sei hatete duni , basta ita-boot sira iha fuan-boot para atu simu desizaun Prezidénte nian”,subliña Xefe-de-Estadu.
Ba opiniaun balu ne’ebé hatete Prezidente-da-Repúblika iha “dilema” atu foti desizaun relasiona ho atuál situasaun polítika, Xefe-de-Estadu responde:

“Ba ha’u laiha dilemátiku. Ba Prezidente-da-Repúblika nunka moris iha situasaun dilemátiku nia laran na medida enke Prezidente hatene katak dalan atu deside ne’e oinsá. Prezidente sei deside a favor nein ba koligasaun-de-partidus, nein ba iha AMP. Prezidente sei deside nein a favor ba partidu ida. Ha’u sei deside tuir de’it saida mak konstituisaun haruka”.