Diskursu Prezidente Repúblika-20 setembru 2019

by Mídia PR Posted on

 Intervensaun hosi Sua Exelénsia Prezidente Repúblika, Francisco Guterres Lú Olo,Iha serimónia komemorasaun Aniversáriu INTERFET Tama Ain iha Timor-Leste ba dala 20

 

 

Povu doben Timor-Leste.

Ohin, halo tinan ruanulu , Forsa Internasionál ba Timor-Leste (INTERFET), hodi komunidade internasionál nia naran, tama iha Dili, hodi kumpre Rezolusaun 1264 Nasoins Unidas nian. Misaun ne’e nia prioridade mak atu harii filafali pás no estabilidade iha Timor-Leste. Forsa Internasionál ida ne’e lidera hosi Austrália, ho komandu Jenerál Sir Peter Cosgrove, ne’ebé ikusmai sai Governadór-Jerál Austrália.

Ohin ita selebra loron importante ida ne’ebé halo parte ita-nia prosesu luta ba autodeterminasaun no independénsia.

Ita-nia mehi atu kore an husi domíniu estranjeiru nakfila ba realidade iha loron 30 fulan-Agostu tinan 1999, bainhira ita-nia Povu, ho barani no laran-metin, hala’o ita-nia direitu ba autodeterminasaun liuhusi sufrájiu universál, sekretu no diretu, ne’ebé rekoñesidu iha mundu tomak. Ho supervizaun Nasoins Unidas nian, ita-nia populasaun besik pursentu ualunulu rejeita autonomia ho Indonézia no nune’e, hili ukun-rasik an.

Mehi ne’e ita hetan duni maibé,  Povu timoroan selu ho folin  aas tebes. Bainhira ONU fó-sai  rezultadu Konsulta Populár nian, mosu klima tensaun ne’ebé ikusmai kria laloran violénsia no terrór husi milísia pró-Indonézia hamutuk ho membrus balun husi TNI.

Ho laran-hakfodak mak mundu tomak asisteinfraestrutura nasaun nian rahun. Uma barak  tebetebes mak hetan-sunu mutuk iha munisípiu hotu-hotu no lailais de’it, mosu kedas ambiente hata’uk  ema iha territóriu laran tomak.

Polítika “sunu rai” harahun ita –nia territóriu   katoluk rua, inklui ita-nia patrimóniu kulturál lubuk boot ida, ita-nia memória institusionál. Haktuir relatóriu husi Komisaun Lia-Loos, Simu Malu no Rekonsiliasaun, ema hamutuk rihun ida atus haat to’o rihun ida atus lima mak hetan oho ka lakon iha períodu tinan 1999 nia laran, no maizumenus ema rihun atus rua limanulu sai refujiadu iha Timor Osidentál.

Situasaun harahun no hata’uk ita-nia ema hamosu protestu iha fatin barak iha mundu. Hodi Estadu Timor-Leste nia naran, ha’u hakarak ko’alia kona-ba impaktu husi kordaun umanu sivíl katak kaer liman metin, iha rai oin-oin, hodi tulun lesuk  Timor-Leste. Ema rihun ba rihun marxa iha liurón-públiku no ezije husi sira-nia governu atu halo buat ruma hodi kontribui ba harii filafali pás no estabilidade iha Timor-Leste. Haree mós ba ezijénsia sira husi kordaun  umanu ne’e, ne’ébé tuba rai metin nafatin, mak membrus Organizasaun Nasois Unidas, haree ba Kapítulu VII Karta Nasoins Unidas nian,  aprova Rezolusaun 1264, iha 15 setembru 1999, ne’ebé autoriza harii forsa multinasional ida atu mai Timor-Leste. Rai sira ne’ebé halo parte INTERFET mak: Austrália, Nova Zelândia, Estados Unidos da América, Reino Unido, Tailândia, Brasil, Canadá, Fiji, França, Alemanha, Irlanda, Itália, Jordânia, Kenya, Malásia, Noruega, Paquistão, Filipinas, Portugal, Singapura e Coreia do Sul.

Ho komandu Jenerál Peter Cosgrove nian, INTERFET tama Dili iha 20 fulan-Setembru no hetan sidade ida naksobu tiha ona no haree Povu moris hela iha ta’uk no terrór laran.

Enkuantu INTERFET buka estabiliza situasaun, ita-nia Forças Armadas de Libertação Nacional de Timor-Leste (FALINTIL) halibur an iha fatin akantonamentu iha Waimori-Laleia, Atelari-Baucau no mós iha Nahareka no Osolekimeta iha Ossú.  Situasaun runguranga no raan-fakar ne’e iha territóriu laran tomak hamosu sentimentu oin-oin  kahur-malu Iha akampamentu sira-ne’e.

Maski nune’e, FALINTIL konsege hakmatek an  iha sira-nia hela fatin tanba hatene tiha ona katak dalan naruk luta nian habadak tiha ona. Sira la halo retaliasaun ida. Iha akantonamentu sira ne’e,  gerrileiru sira hakru’uk nafatin ba orientasaun husi  komandu superior atu mantein  dixiplinadu, armadu no kumpre Akordu 5 Maiu asina iha Nova Iorke entre Portugál no Indonézia: katak autoridade indonézia sira mesak de’it mak kaer responsabilidade ba seguransa.

Hafoin INTERFET tama Timor-Leste, organizasaun umanitária barak mós mai Timor-Leste hodi fó tulun ai-han no asegura kuidadu saúde báziku emerjénsia ba refujiadu no dezlokadu sira. Ha’u aproveita oportunidade ida-ne’e hodi fó omenájen mós ba organizasaun sira ne’e, inklui voluntáriu rihun ba rihun ne’ebé kontribui ba hakmaan uitoan  komunidade sira ne’ebé moris  iha susar laran.

Ha’u hakarak mós fó omenájen ba média sira ne’ebé ho aten-barani fó-sai ba mundu tomak kona-ba susar no terus ne’ebé Timoroan sira hasoru durante fulan Setembru. Sira buka fó-hatene mós Povu nia mehi ba independénsia. Mak sira la  halo ida ne’e  karik,  mundu kala la hetan koñesimentu natón kona-ba ita-nia luta ba autodeterminasaun no ukun-rasik an.

 

Ita hanoin hikas loron ohin ne’e atu fó omenájen   liuliu ba militár sira-ne’ebé kumpre sira-nia misaun no fó onra ba ida-idak nia bandeira bainhira partisipa iha “Operasaun Estabilizasaun”. Misaun ida ne’e hotu ho susesu no  dominasaun indonézia mós hotu, no dalan loke ba timoroan restaura Timor-Leste, nu’udar Nasaun.

Hamutuk Nasaun ruanulu resin ida mak fó sira nia kontribuisaun, boot ka kiik, ba INTERFET iha períodu oin-oin, maibé kontribuisaun boot liu mai hosi Austrália no Nova Zelándia.

Tanba ne’e , ita agradese  governu Austrália ne’ebé kompromete an atu lidera esforsu internasionál ba manutensaun pás, hodi restaura fali orden iha  ita-nia Rain.

INTERFET ninia susesu militar,  sai modelu di’ak ida ba operasaun halo manutensaun  pás sira seluk. Sira  konsege kumpre duni sira-nia misaun  hakmatek ita-nia Rain.

ONU implementa  nia mandatu ho di’ak, tuir regras ne’ebé hatuur.

Husi Funu Golfu nian, forsa internasionál ida ne’e  mak simu mandatu forte  no klaru liu to’o ohinloron. INTERFET   mai Timor-Leste, ho preparasaun di’ak tebes, ho ekipamentus no kilat ne’ebé adekuadu hodi enfrenta ambiente ida ne’ebé lahakmatek, ho risku aas tebes no nakonu ho inserteza.

INTERFET  hala’o  sira-nia knaar ho regras ne’ebé dehan katak bele uza de’it forsa nu’udar rekursu ikusliu.

Povu timoroan hakarak loos atu Nasoins Unidas mai lalais no ita simu soldadu INTERFET sira  ho laran-haksolok tebes. Importante INTERFET tama iha momentu ne’ebá tanba haburas kedas klima seguransa no ambiente estável no seguru liután ba UNTAET hodi bele hala’o ninia knaar no mós loke dalan ba ita timoroan hodi bele hakaat ba oin to’o ita restaura ita-nia independénsia iha Maiu 2002.

Ita-Boot sira-nia jestu solidariedade sei metin iha ami-nia fuan. Estadu Timor-Leste hamosu Medalla Solidariedade Timor-Leste atu rekoñese mós militár estranjeiru sira ne’ebé simu mandatu atu asiste operasaun Defeza no Seguransa  durante períodu INTERFET, entre 20 setembru 1999 no 28 fevereiru 2000.

Ba Komandante asuwa’in INTERFET nian, Estadu Timor-Leste kondekora ho Kolar Órden Timor-Leste, iha 2009 no ho Grande Kolár Órden Timor-Leste, iha 2016, bainhira kaer ona knaar nu’udar Governadór-Jerál Austrália. Órden ne’e harii hodi rekoñese, ho prestíjiu no dignidade, nasionál no estranjeiru sira, ne’ebé liuhusi sira-nia atividade profisionál, sosiál no,  liuhusi atu eróiku  ka  domin ba ema, fó benefísiu boot ba Timor-Leste, timoroan sira ka ba Umanidade.

Lori Repúblika no Povu Timor-Leste nia naran no, ho laran-murak,  ha’u hakarak agradese dala ida tan ba militár sira-ne’ebé fó an tomak durante períodu INTERFET. Permite ha’u hato’o saudasaun espesiál ba ita-nia belun boot, Jenerál  Peter Cosgrove.

Iha fulan-fevereiru tinan 2000, komandu operasoins entrega ba  Forsas Pás ONU nian (PKF), komponente militár UNTAET nian.

Iha tinan 2016, ita hako’ak fila fali  soldadu dame balun ne’ebé horiuluk halo parte INTERFET bainhira veteranu husi Austrália hahú programa multidimensionál ida iha Timor-Leste hanaran “Timor Awakening” ka “Hafanun-an iha Timor”. Programa  ne’e envolve mós veteranu sira husi Timor-Leste.  Programa ida-ne’e haree Timor-Leste nu’udar santuáriu ida katak fatin-hakmatek ida hodi  veteranus Austrália hadi’ak sira-nia saúde. Laó’s de’it ba militár sira ne’ebé serví iha Timor-Leste maibé  ba sira ne’ebé hala’o sira-nia misaun  iha fatin konflitu sira seluk.. Iha mós atividade sira seluk ne’ebé sira hala’o dadaun hela.  Ida mak dezenvolve fatin istóriku sira-ne’ebé iha relasaun ho Funu Mundiál Daruak no -ita-nia luta libertasaun nasionál. Nune’e, programa ida ne’e bele kontribui ba haburas turizmu istóriku iha Timor-Leste nu’udar área turizmu espesiál ida ne’ebé ita presiza investe ba, hodi ita bele hala’o diversifikasaun ekonómika.  Ha’u fiar katak atividade sirane’e sei hametin liután solidariedade entre  veteranu sira no ita-nia Povu sira.

Timor-Leste Nasaun nurak lida iha mundu, ne’ebé liu horiuluk husi situasaun okupasaun koloniál ho violénsia oin-oin no esplorasaun durante tinan atus ba atus.

ONU mai hetan  iha Timor-Leste  sosiedade ida iha situasaun  pós-konflitu,  ho susar oin-oin, ida ne’ebé presiza hetan estabilidade polítika, halo rekuperasaun ekonómika no rekonsiliasaun. Ne’e teste difícil ida ba ONU.

Maibé ohin, liutiha tinan 20,  ita bele hatete katak ita, ho ita-nia esforsu rasik, la’ós konsege mantein de’it pás no estabilidade, maibé , ita mós harii ai-riin ba sosiedade pasífiku ida, justu no simu malu biar iha diferensa oin-oin. Ita Povu ida ne’ebé iha karaterístika oin-oin, ho oríjen étnika, relijiaun no fiar oin-oin maibé ita-nia nia sentimentu Timoroan kesi metin ita hamutuk, ho pasadu luta eróika ne’ebé hakaat mós ba tasi-balun.

Hafoin restaura ita-nia independénsia, ita konsege harii Estadu foun ida hatuur ho Konstituisaun modernu ida.

Ita identifika ona sá dezafiu mak ita iha. Ita presiza de’it buka dalan loloos atu hetan  modelu dezenvolvimentu ida ne’ebé demokrátiku no sustentável ba ita-nia sosiedade,  atu bele halakon kiak iha ita-nia Rain,  iha aspetu hotu-hotu.

Ba faze luta daruak ne’e, ita konta nafatin ho solidariedade husi ita-nia belun horiluk sira husi rede internasionál ne’ebé ita hametin to’o ohinloron, no mós ho kooperasaun  bilaterál no multilaterál.

Iha rai Timor-Leste nian, ita sei kuda nafatin ai-oan sira ne’ebé  sei fó fuan di’ak liu iha tempu badak!

Viva Soldadu Dame sira!

Viva Povu Timor-Leste!