INTERVENSAUN HUSI SUA EXELÉNSIA PREZIDENTE REPÚBLIKA IHA KINTU KONGRESU CNJTL

by Mídia PR Posted on

Dili, 18 janeiru 2020

Reverendisimo Arsebispo Metropolitano  Arquidiocese de Dili, Dom Virgílio do Carmo da Silva

Prezidente  CNJTL Sesante, Sra. Dadi  Magno no ekipa tomak

Maluk sira hotu husi organizasaun Juventude  Rezisténsia

Juventude hosi Partidu Politiku sira

Karísisimus kongresistas no konvidadus

Onra boot mai ha’u  marka prezensa iha ne’e atu hato’o rasik ha’u-nia apoiu tomak ba CNJTL, nu’udar líder iha tempu Rezisténsia no nu’udar Prezidente Repúblika.

Kongresu ida ne’e hadi’a hela   Estatutus, regulamentus no sei hili líder foun no ha’u fiar katak CNJTL sei la’o di’ak liután tinan lima tuir mai.

Maluk joven sira,

Juventude mak ai-rin Povu no Nasaun Timor-Leste nian. Juventude  hamriik  kedas husi  tempu ne’ebé ita hahú organiza-an hodi luta ba ita-nia identidade, nu’udar Povu no Nasaun.

Importante ba ita hotu hatuur istória  loloos Rezisténsia Juventude nian, ho faktus, molok ita haluha ka mate. Ho objetivu ida ne’e, ha’u hakarak fó-hanoin ohin katak CNJTL mai husi istória naruk ida, tanba nia hun mak  organizasaun rezisténsia sira tuir mai ne’e: OJETIL, OPJELATIL, FITUN, Sagrada Família UNIAMORTE, UJTL,

Ativista Prokemerdekaan, Dewan Solidaritas, CNJ, Uniaun Morte, RENETIL, DPP IMPETU, BPPM/Aliansa Juventude Maubere no Organizasaun Trabalhadores “Moris Dame”,   Fuan Domin, AHOC no  AST.

Nu’udar organizasaun joven sira-nian, hamahon-an iha  FRETILIN-Movimentu ka nu’udar organizasaun estudantes,  organizasaun sira ne’e  mak harii Prezidium Juventude Lorico Ass’wain (PJLA),  iha marsu 1999, hafoin hetan malu ho  líder CNRT, Xanana Gusmão, iha Salemba.  Hafoin Akordu 5 maiu 1999, PJLA harii iha Dili, nu’udar organizasaun-sombrinha Organizasaun Juventude  sira-nian hodi  servisu hamutuk ho CNRT – Rezisténsia, atu ita alkansa objetivu Ukun Rasik-an.

Maibé,  organizasaun ne’ebé de’it la buras sein ema. Nune’e, ha’u hakarak  temi no  rekoñese líder joven sira,  ne’ebé brani lidera no kaer metin oganizasaun sira, iha tempu rezisténsia no ukun an. Iha 1999, PJLA   lidera uluk husi  Juvêncio Martins, Mariano Assanami no Zebra Metan. Iha Outubru 1999, liuhusi Kongresu Nasional, kongressista sira eleje Ricardo Ribeiro, José da Costa, Leovogildo Ornai no Costa Brandão, nu’udar líderes PJLA nian. Iha Kongresu ba dala rua, halo iha 2002, PJLA nakfilak ba CNJTL no hili Miguel Manitelo, nu’udar Prezidente. Terseiru no Kuartu Kongresu hili  Leovogildo   Ornai, no ikus mai CNJTL lidera husi Dadi Magno. CNJTL sei lidera  iha tinan lima tuir mai  husi joven líder foun ida ba tinan tuir mai. Perkursu ida ne’e hatudu katak imi joven sira,  dedika-an duni ba ita-nia kauza nasional: Liberta Pátria no liberta Povu.

Joven maluk sira,

Durante funu ba libertasaun nasionál, iha áreas libertadas, organizasaun rezisténsia juventude sira-nian fó an  tomak hodi organiza área sira ne’e no partisipa iha programas alfabetizasaun, saúde,  atividade produsaun no seluk-seluk. Wainhira bases de apoio rahun,  juventude kontinua sira-nia asaun iha vila laran no, iha tempu oportunu, konsegue lori duni funu libertasaun nasionál tama ba  inimigu nia uma laran.

Juventude Lorico Ass’wain sira-nia partisipasaun iha luta libertasaun nasionál importante tebes ba ita-nia vitória final:   ukun rasik an. Nune’e, ohinloron organizasaun Rezisténsia  juventude sira-nian, ne’ebé hamahon-an  iha CNJTL,  iha obrigasaun hodi valoriza no kontinua legadu husik husi  Juventude Rezisténsia;   husi Lorico Ass’wain sira ne’ebé luta iha  rai-laran  no husi sira ne’ebé lori luta ba inimigu nia uma laran no mós husi  sira ne’ebé namkarik iha Portugal,  Austrália no rai sira seluk.

Maluk joven sira

Ha’u hakarak aproveita oportunidade ida ne’e hodi felisita CNJTL ba realizasaun Kongresu Nasionál ba dala 5 no fó parabéns ba equipa ne’ebé elege liuhusi Kongresu ida ne’e.

Ohin loron ita moris ho pás no estabilidade, iha klima de liberdade no ita rasik mak kaer destinu ita-nia Nasaun nian. Ita harii dadaun ita-nia Estado de Direito Democrático ne’ebé bazeia ba pluripartidarismu. Iha ambiente demokrátiku ida ne’e,  ha’u halo apelu ba joven sira atu kaer metin valores no prinsípius ne’ebé  uluk orienta juventude rezisténsia hodi aplika, ohinloron,  iha   ita-nia prosesu dezenvolvimentu nasionál. Pluralidade iha hanoin no iha partidu polítiku sira labele taka dalan ba imi hodi buka ko’alia ba malu, buka konserta hanoin no hetan  konsensu iha diversidade nia laran, ba asuntu sira ho interese nasionál.

Nune’e, demokrasia no pluralismu la’ós de’it lori eleitor-sira ba vota iha eleisaun hodi fó maioria ka minoria, maibé oinsá  fó-hanoin ba malu atu hetan solusaun ba interese ba Povu no Nasaun!

Artigu 19º husi ita-nia Konstituisaun dehan katak “Estadu promove no enkoraja juventude nia inisiativas atu hametin unidade nasionál no atu rekonstrói, defende no dezenvolve país”.

Ita-nia luta Rezisténsia halo ho kombatente sira ne’ebé la iha formasaun akadémika  maibé ita halo no manán ita-nia luta ho ita-nia kriatividade rasik, ho ita-nia matenek no hahalok  rasik. Ita tenke uza nafatin kbiit rasik iha servisu ne’ebé de’it  maibé,  ohinloron, ita iha ona kondisaun atu hasa’e koñesimentu, kompeténsia no aptidaun ba traballador ida-idak, liuhusi edukasaun formal no informal. Maioria joven buka liuliu  simu edukasaun husi Universidade maibé, iha mós dalan seluk, formál no informál, atu sai profisionál di’ak. Pur-ezemplu,  joven sira bele hetan abilidade profisionál  husi mós eskola vokasional sira.

Maibé bele mós aprende sai profisionál di’ak  liuhusi  aprende husi ema seluk iha servisu-fatin ruma no/ ka  liuhusi ninia matenek rasik, husi nia hahalok rasik.  Ha’u hakarak hatete katak, liuhusi edukasaun formál ka informál,  ita bele  kria empregu no promove dezenvolvimentu nasionál.

Tanba la iha investimentus loloos iha área edukasaun no saúde, mak ita-nia produtividade no kreximentu ekonómiku mós sei  kiik hela. Bainhira produtividade kiik nafatin, saláriu labele aumenta no, kondisaun ida ne’e, karik nafatin,  la fó dalan ba ita moris-di’ak.

Maluk joven sira

Ita-nia país kiik ne’e presiza tebes juventude nia partisipasaun ativa iha dezenvolvimentu nasionál. Atu afirma ita-nia existénsia, hametin unidade nasionál no rekonstrói, defende no dezenvolve ita-nia país, ita tenke valoriza ita-nia identidade. Ho identidade rasik mak ita sei afirma-an iha kontestu rejionál no internasionál. Iha tinan 1991, wainhira militar indonéziu sira tiru mate ita-nia joven sira iha Rate Sta. Kruz,  mundu tomak  haree  imajen ne’ebé  jornalista   internasionál sira konsege hasai ba rai-liur,   no haree   katak  joven  Timoroan sira    reza  ho  lian portugés.

Ida ne’e signifika katak relijiaun katólika no lian portugés kontribui hodi forma ita-nia identidade ne’ebé únika  no distinge ita husi  Povu sira seluk,  iha rejiaun ne’ebé ita halo parte. Timor-Leste  iha ligasaun di’ak liu  ho kontinente hothotu, liuhusi komunidade husi país sira ne’ebé ko’alia lian portugés, iha Europa, Áfrika no Amérika do Sul. Ho lian, relijiaun no aspetu sósiu-kultural rasik, mak ita hamriik ohinloron, nu’udar Nasaun no Povu.

Maluk Joven sira hotu,

Ha’u fiar katak joven sira sei partisipa nafatin ba dezenvolvimentu nasionál país nian, sei kompromete nafatin hodi kombate hasoru kiak no dezigualdade hothotu, hodi ita bele harii hamutuk  Estadu ida ne’ebé ita-hotu mehi, Estadu ida ne’ebé ninia sidadaun sira moris ho haksolok.

Ohin,  ha’u hakarak bolu mós ita-hotu nia atensaun ba asuntu ida ne’ebé ita-hotu nia responsabilidade: tau matan ba ita-nia natureza. Ita-hotu asiste hela trajédia boot ne’ebé ita-nia país viziñu, Austrália, hasoru hela hanesan rezultadu husi ahi-han  deskontroladu, ne’ebé hasai ema no animal lubun ida nia vida, halakon ema-nia uma barak lós no ameasa maka’as biodiversidade Austrália nian.

Iha 14 Janeiru liubá,  lori Povu Timor-Leste nia naran, ha’u hato’o mensajém  ba Povu Australianu, ita-nia belun di’ak ida, hodi hatudu ita-nia solidariedade ba sira. Buat ne’ebé akontese hela iha ita-nia uma sorin tenke lori ita hodi hanoin  klean no  didiak saída mak ita bele halo, nu’udar timoroan,  hodi prezerva ita-nia uma-komún,  ita-nia planeta Terra. Nune’e,  ha’u halo apelu ida tán ba imi, joven sira, hodi ajuda prezerva no tau matan ba ita-nia natureza. Prezidente Repúblika asumi mós kompromisu fó atensaun ba kestaun sira ne’ebé iha ligasaun ho meiu-ambiente no dezenvolvimentu sustentável. Nune’e,  ha’u konvida imi hotu, liuhusi CNJTL, atu hamutuk ho ha’u, partisipa iha kampaña nasionál “sidadaun ida, ai-oan ida” hodi kuda, iha ita-nia rai laran tomak, ai-oan millaun ida, hodi kontribui ba prezervasaun ita-nia meiu-ambiente nian.

Maluk joven sira hotu,

Ohin,  ha’u  hakarak  rekoñese no fó parabéns  ba joven sira hotu, ho knaar lideransa ka lae, ne’ebé hakaas-an hodi halo buat ruma, liuhusi inisiativa individuál ka nu’udar organizasaun rezisténsia ida-idak no,  husi 1999, nu’udar  PJLA no husi 2002 to ohinloron, nu’udar CNJTL. Hahalok di’ak,  Kiik ka boot,  importante hotu.

Iha kompetisaun ne’ebé de’it, iha lakon no manán.  Kompetisaun ba lideransa  CNJTL  importante tebetebes  tanba promove  demokrasia iha organizasaun laran.  Ha’u hakarak fó-hanoin ba kongresista sira hotu katak  sira ne’ebé lakon, iha eleisaun ohin, iha mós matenek rasik. Ne’ebé ha’u hein katak líder foun   sei  lahaluha dada sira atu kontribui mós ba lideransa foun atu hetan susesu no nune’e, kumpri misaun CNJTL  nian, iha tinan lima tuir mai.

Ha’u fiar katak  eis-líder husi CNJTL  sei fó liman mós  ba lideransa foun CNJTL.

Dala ida tán parabéns ba realizasaun Kongresu ba dala lima ho votus felisidades no susesu ba mandatu foun,  nu’udar organizasaun reprezentante ba organizasaun hothotu  Juventude Timor-Leste nian.

Ha’u-nia hakoak boot ba imi hotu!

Viva CNJTL!

Viva Juventude Timor-Leste!