MAJOR JENERAL LERE ANAN TIMUR PREOKUPA HO SEGURANSA MARÍTIMA

by Mídia PR Posted on

 

Palásiu Prezidensiál Nicolau Lobato, Díli, 15 janeiru 2020

Xefe Estadu Maior Jenerál Lere Anan Timur iha audiénsia ho Prezidente Repúblika, Francisco Guterres Lú Olo, ohin, hateten katak preokupa tebes ho seguransa fronteira marítima.

Tuir Maijor Jenerál katak foin lalais Prezidente Repúblika iha Komemorasaun Aniversáriu Komponente Naval FALINTIL-Forsa Defeza Timor-Leste (F-FDTL) iha 12 Janeiru ba dala-18 hato’o tiha ona ninian hanoin kona-ba saida mak Governu tenke halo atu hametin seguransa fronteira marítima.

Iha Komemorasaun Aniversáriu Komponente Naval, Xefe Estadu Maior Jenerál hato’o ba Prezidente Repúblika no nu’udar Komandante Supremu F-FDTL katak to’o ona tempu atu asegura tasi Timor tanba ne’e Estadu tenke fó prioridade ba Komponente Naval no Aeria.

Iha oportunidade ne’e, Prezidente Repúblika hateten katak Timor-Leste nu’udar nasaun mesak labele fó seguransa ba nia tasi tanba ne’e presiza promove seguransa koletiva ka seguransa rejionál hamutuk no salienta dala ida tan kona-ba harii Sistema Nasionál Autoridade Marítima.

Sistema Nasionál Autoridade Marítima ne’e foka ba konseitu “duplu uzu” iha operasaun seguransa tasi nian, hodi obriga Mariña atu iha mós kapasidade hatan iha área polisiamentu hodi hatuur lei no partisipa iha konflitu ne’ebé ho intensidade ki’ik.

“Ita dehan na’in ba tasi, dalaruma ita ko’alia de’it. Mas loloos ita na’in ba tasi ne’e seidauk loos tanba fronteira marítima abandonadu hela. …Forsa Tereste seidauk sufisiente maibé bele hala’o ona nia kna’ar”, Lere Anan Timur haktuir.

Timor-Leste iha kooperasun trilateral ho Indonézia no Japaun atu asegura tasi. Iha parte seluk, Governu Australia oferese ona ró militár rua ne’ebé sei entrega iha 2023 no hatudu tiha ona nia vontade atu koopera ho Timor-Leste atu tau matan ba seguransa marítima.

MÍDIA PR.