PJR LA SIMU DESIZAUN TRIBUNÁL REKURSU BA KAZU TIMOR SEA RESOURCES PTY LTD.

by Mídia PR Posted on

Palásiu Prezidensiál Nicolau Lobato, Díli, 16 janeiru 2020

Prezidente Repúblika, Francisco Guterres Lú Olo hala’o sorumutu mensál ho Prokuradór Jerál Repúblika, José da Costa Ximenes ne’ebé iha okaziaun ida ne’e hato’o nia preokupasaun relasiona ho desizaun Tribunál Rekursu iha 21 novembru 2019, ne’ebé manteian desizaun primeira instansia ba petisaun ne’ebé aprezenta hosi Kompania Internasional Timor Sea Resources PTY LTD.

Kompania ida ne’e halo rekursu kontensiuzu kontra desizaun Diresaun Jerál Reseitas no Alfándega ne’ebé aplika kustu adisionál tanba kompania la selu taxa, hamutuk dollar 5. 495. 222.

“Tuir tratadu katak bainhira kompania sira halo esplorasaun iha Tasi Timor, bele selu taxa iha Timor ou iha Australia. Agora, tamba saida mak Diresaun Jeral ne’e aplika penalizasun ba nia ho kustu adisionál. Tanba kompania ida ne’e la halo atividade eskluzivu iha Tasi Timor maibé halo mós investimentu seluk”, esplika prokuradór José Ximenes.

Ho desizaun Tribunál nian ida ne’e Estadu Timor-Leste tenki selu ba kompania Timor Sea Resources PTY LTD ho sede iha Perth, Australia ne’e, osan hamutuk 7.7 milloens dollar.

“Ita respeita Tribunal nia desizaun, primeira instánsia, sobretudo Tribunál Superior hanesan Tribunál Rekursu. (…) Ami respeita mas la simu desizaun ida ne’e. Ami sei buka meius hotu-hotu para haree saida mak ita bele halo”, deklara Prokuradór José Ximenes, ne’ebé konsidera desizaun ida ne’e injustu tanba deskonsidera argumentus jurídikus ne’ebé maka Ministériu Públiku aprezenta iha ninia rekursu” nomós deskonsidera rekursu advogadu ne’ebé Governu kontrata atu defende Estadu ninia rekursu, sein fó argumentus ruma.

“Mas preokupasaun bootliu, la’os ita lakon 7 miloens dollar amerikanu. Desizaun ida ne’e sei sai jurisprudénsia ne’ebé kompania internasionál sira bele utiliza para bele halo mós maneira hanesan, ne’ebé ke ba futuru, bele prejudika Estadu Timor-Leste barakliutan.  Tanba ida ne’e mak ami la aseita”, subliña Prokuradór José Ximenes.

MÍDIA PR