PREZIDÉNSIA REPÚBLIKA KOOPERA HO CONSERVATION INTERNATIONAL ATU HAMETIN KAMPAÑA NASIONÁL “SIDADAUN IDA, AI-OAN IDA”

by Mídia PR Posted on

Palásiu Prezidensiál Nicolau Lobato, Díli, 16 janeiru 2020

Chefe da Casa Civil husi Prezidénsia Repúblika, Francisco Maria de Vasconcelos, ohin,  asina Memorandu Entendimentu ho Diretora Conservation International Timor-Leste, Trudiann Dale atu hametin liután Kampaña Nasional Kuda Ai “Sidadaun Ida, Ai-oan Ida”.

Chefe Casa Civil haksolok ho Conservation International ne’ebé servisu hamutuk ho Prezidénsia Repúblika tanba meiu ambiente nu’udar asuntu global no asuntu ema hotu nian ne’ebé liga ho ema no biodiversidade nia moris.

Diretora Conservation International Timor-Leste agradese tebes tanba Prezidénsia Repúblika hili ninian organizasaun atu koopera hodi tau matan kestaun kestaun ambiente ne’ebé sai prioridade ba nasaun hanesan degradasaun rai, ai-horik barak, be iha rai okos,  rai bokur ne’ebé lakon husi tinan ba tinan iha Timor-Leste.

Trudiann Dale hateten katak Conservation International orgullu tebes ho kooperasaun ne’e tanba vizaun kuda ai-oan miliaun ida no tau matan ba mudansa klimátika hatudu Prezidente Repúbilka nu’udar ema vizionariu ida. Nasaun barak iha mundu seidauk haree impaktu mudansa klimátika.

Memorandu Intendimentu ne’e, Conservation International sei fó apoiu tékniku ba Kampaña Nasionál “Sidadaun Ida, Ai-Oan Ida” atu kuda ai-oan tokon ida iha Timor-Leste tomak.  Apoiu tékniku ne’ebé Conservation International sei kontribui ba  kampaña ne’e mak: hasa’e kapasidade tékniku komunidade, monitorizasaun no avaliasaun, mapeamentu ba área atu kuda, indentifika no dezenvolve oportunidade atu hetan finansiamentu ba programa.

Prezidente Repúblika, Francisco Guterres Lú Olo, iha Janeiru 2019, lansa Kampaña Nasionál “Sidadaun Ida, Ai-oan Ida” ne’ebé envolve entidade hotu-hotu kuda ai-horis miliaun ida durante mandatu nu’udar parte husi kontribuisaun sidadaun ida-idak ba meiu ambiente no dezenvolvimentu sustentavel.

Conservation International nu’udar organizasaun global ne’ebé hala’o nia serbisu iha nasaun 40 no hahú serbisu iha Timor-Leste desde tinan-2009. Iha Timor-Leste, Conservation International foka nia serbisu iha kriasaun rede àrea protejida, apoiu komunidade, konservasaun tasi no turismu ho baze komunitária.

MÍDIA PR.