PREZIDENTE REPÚBLIKA KONTINUA APOIU KONSTRUSAUN AEROPORTO NICOLAU LOBATO

by Mídia PR Posted on

Palásiu Prezidensiál Nicolau Lobato, Díli, 15 janeiru 2020

Prezidente Repúblika, Francisco Guterres Lú Olo, iha hasoru malu ho Vise Ministru Negosiu Estranjeiru Japaun, Nakayama Norihiro, hateten katak sei kontinua fó apoiu ba Governu Japaun atu halo konstrusaun Aero Portu Internasionál Nicolau Lobato.

Prezidente Repúblika rekoñese katak maske iha diferensa uitoan iha hanoin kona-ba konstrusaun aeroporto iha Díli tanba husi parte Governu Timor-Leste hakarak iha aeroportu ho kualidade ne’ebé di’ak liu, maibé Xefe Estadu sei kontinua ko’alia ho Primeiru Ministru Taur Matan Ruak atu haree asuntu refere.

Vise Ministru Negosiu Estranjeiru hateten katak Governu prontu nafatin atu fó apoiu atu halo konstrusaun ba aeroportu maibé iha limite $ 44 miloens dolares ne’ebé aprova tinan kotuk iha Japaun.

Kooperasaun bilateral entre Japaun no Timor-Leste ne’ebé la’o di’ak tebes, Prezidente Repúblika hateten katak sei nomea Embaixadór Timor-Leste ba Japaun i atu hametin liután relasaun nasaun rua.

Prezensa Vise Ministru, Nakayama Norihiro, nu’udar parte husi selebrasaun tinan-20 kooperasaun Timor-Leste ho Japaun.  Governu Japaun hahú fó apoiu ba Timor-Leste iha momentu difísil iha tinan-1999 to’o ohin loron. JICA hahú estabelese nia kooperasaun iha Timor-Leste iha 2000.

Iha vizita ne’e, Vise Ministru sei haree projetu husi Governu Japaun hanesan konstrusaun uma ba Fakuldade Engineria Universidade Nasionál Timor-Lorosa’e (UNTL), Portu Díli no ko’alia kona-ba konstrusaun Aeroportu Internasionál Nicolau Lobato.

Vise-Ministru espera katak apoiu sira ne’e bele kontribui ba dezenvolvimentu siensia no rekursu umanu atu diversifika industria, fasilita mobilidade ema no sasan hodi kontribui ba ekonomia rai-laran.

Governu Japaun fó apoiu ba Timor-Leste iha area kapasitasaun, rekursu umanus, reabilitasaun infraestrutura no hadi’ak kondisaun moris no saúde.  Iha area marítima, Timor-Leste, Japaun no Indonézia iha koperasaun trilaterál atu asegura tasi.

MÍDIA PR.