PRIMEIRU MINISTRU AGRADESE PREZIDENTE REPÚBLIKA TAN KOMPLETA ESTRUTURA GOVERNU

by Mídia PR Posted on

Palásiu Prezidensiál Nicolau Lobato, Díli, 25 juñu 2020

Primeiru Ministru, Taur Matan Ruak agradese Prezidente Repúblika, Francisco Guterres Lú Olo tan fó posse ba membru foun hodi kompleta estrutura VII Governu Konstitusionál.

Hafoin audiénsia ho Prezidente Repúblika, Primeiru Ministru hateten katak finalmente Governu kompleta ona no sei iha kbiit liután atu hala’o serbisu sira ne’ebé tenke halo iha tempu oinmai.

“Ha’u kontente loos tanba ha’u-nia ekipa kompletu. Kuaze tinan rua la’o ho roda tolu. Primeira vez ho roda haat. Ha’u espera katak ho ekipa ida ne’e bele halo esforsu, presta servisu ba sidadaun sira, tau makina estadu la’o, tenta enfrenta situasaun moras, ekonomia  no problema sosias,” Primeiru Ministru hateten.

Primeiru Ministru hatetan katak membru VIII Governu ne’ebé kompletu sei eleva kapasidade ezekusaun Orsamentu Jerál Estadu.

Xefe Governu informa ba Prezidente Repúblika kona-ba pagamentu subsidiu ba komunidade sira ne’ebé besik atu hotu ona, falta kompleta iha Díli. Hein katak iha loron ida ka rua sei remata.

Ba sidadaun sira ne’ebé seidauk hetan subsidiu, Ministériu Solidariedade Sosiál iha responsabilidade atu hadi’ak no buka atu hatene tansa.

Primeiru Ministru hein Parlamentu Nasionál bele aprova lalais Lei Anti Korrupsaun. Ho aprovasaun Lei Anti Korupsaun halo Timor-Leste iha regras rigorozu hodi kombate korupsaun.

Komisaun A Parlamentu Nasionál hala’o hela audiénsia ho Comissão Anti Corrupção no organizasaun sosiedade sivíl atu rona hanoin sira hodi hariku proposta Lei Anti Korrrupsaun molok hala’o debate ba aprovasaun.

 

MÍDIA PR.