JORNADA ORSAMENTÁL BA TINAN-2021 SEI HAHÚ 4 AGOSTU

by Mídia PR Posted on

Palásiu Prezidensiál Nicolau Lobato, Díli, 30 jullu 2020

Primeiru Ministru, Taur Matan Ruak, ohin, iha audiénsia regular, informa ba Prezidente Repúblika, Francisco Guterres, katak jornada orsamentál ba tinan-2021 sei hahú iha 4 agostu.

Jornada orsamentál ba tinan-2021 sei integra Planu Rekuperasaun Ekonómiku tanba ne’e, iha 4 agostu, ekipa téknika  lideradu husi ekonomista Timoroan, Rui Gomes, sei halo aprezentasaun preliminária ba membru VIII Governu Konstitusionál.

“Ita kria grupu ida atu prepara Planu Rekuperasaun Ekonomika no kresimentu ekonomika, tersa feira agora, semana sei halo aprezentasaun preliminaria ba membru Governu sira,  kuarta feira iha jornada orsamentu atu fó ideia  ba 2021 saida mak hanoin atu halo, atu ita haree nia  nia kustu hira. To’o momentu ida ne’eba ita boot sira sei hatene kona-ba prioridade sira atu hili. Naturalmente ida mak empregu no rekuperasaun ekonómiku,” Primeiru Ministru hateten.

Primeiru Ministru, Taur Matan Ruak, estabelese Ekipa Rekuperasaun Ekonómiku iha juñu 2020 atu elabora planu ne’ebé Governu uza hodi dezenvolve ninian programa prioritária ba tinan-2021 ba oin. Iha serimónia posse ba membru Ekipa Rekuperasaun Ekonómika, Xefe Governu fó-sai katak objetivu rekuperasaun ekonómiku mak hetan konsensu kona-ba setór prioritáriu ba investimentu ninian, no ho rekursu ne’ebé menus bele normaliza fila fali ekonomia ekonómia hafoin impasse polítika no pandemia COVID-19.

Tuir relatóriu Banku Mundiál no Banku Sentral Timor-Leste fó-sai katak Timor-Leste nia kresimentu ekonómiku ohinloron nian sai negativu. Tanba ne’e, Primeiru Ministru sei halo esforsu atu normaliza filafali ekonomia rai-laran ninian liuhusi integrasaun Planu Rekuperasaun Ekonómiku ba Orsamentu Jerál Estadu.

Prezidente Repúblika iha oportunidade oioin apela ba Governu atu hala’o atividade produtiva, hamosu empregu no hasa’e rendimentu rai-laran. Iha serimónia posse ba membru VIII Governu, iha 24 juñu,  Xefe Estadu hateten katak Timor-Leste tenke diversifika nia ekonomia no haree oinsá haburas liután ekonomia. Atu hetan susesu, Timor-Leste tenke hatene oinsá aproveita di’ak-liu ninian rekursu umanus.

Ba preokupasaun públiku nian kona-ba kadoras husi Greater Sunrise sei dada mai Timor-Leste ka lae, Primeiru Ministru hateten katak hotu-hotu nia hakarak mak kadoras mai Timor-Leste. Kestaun téknika nian husik ba ema tékniku sira mak taumatan. Ema bele troka maibé projetu sei nafatin.

Xefe Governu informa mós ba Prezidente Repúblika kona-ba subsídiu ba uma-kain iha ámbitu implementasaun estadu emerjénsia ninian ne’ebé konklui tiha ona no agora sei konsentra atu haree reklamasoin sira husi komunidade tanba seidauk simu transferénsia osan husi Governu.

MÍDIA PR.