PREZIDENTE REPÚBLIKA KONSIDERA HANOIN HUSI ASSOCIAÇÃO DOS ANTIGOS DEPUTADOS DE TIMOR-LESTE

by Mídia PR Posted on

 

Palásiu Prezidensiál Nicolau Lobato, Díli, 27 Jullu 2020

Prezidente Repúblika, Francisco Guterres Lú Olo, ohin, iha audiénsia ho Asosiasaun Antigu Deputadus Timor-Leste rona hanoin kona-ba fó rekoñesimentu ba membru na’in-88 ne’ebé hakerek Konstituisaun RDTL.

Prezidente Repúblika hateten katak sei tetu atu fó rekoñesimentu ba membru deputadu na’in-88 ne’ebé hakerek Konstituisaun. Atu fó rekoñesimentu, Prezidente Repúblika sei haree baze jurídiku kona-ba sira-nia kontribuisaun.

Prezidente Associação  dos Antigos Deputados de Timor-Leste, José Nominando Martins ‘Buras’ husu ba Prezidente Repúblika atu fó konsiderasaun ba kontribuisaun deputadu na’in-88 ne’ebé hakerek Konstituisaun RDTL.

José Nominando Martins ‘Buras’ hateten katak organizasaun ne’e mai hasoru Prezidente Repúblika Francisco Guterres Lú Olo, tanba uluk assume kargu nu’udar Prezidente Assembleia Konstituinte no ikusmai sai Prezidente Parlamentu Nasionál iha primeira lejislatura.

Prezidente Repúblika husu mós ba antigu deputadu sira atu serbisu hamutuk ho Parlamentu Nasionál hodi kria komisaun atu transkreve fila prosesu hakerek faktus, valór no intensaun iha prosesu hakerek Konstituisaun RDTL hahú husi primeira sesaun to’o remata atu nune’e jerasaun tuirmai bele halo interpretasaun loloos ba Lei-Inan.

Associação  dos Antigos Deputados de Timor-Leste mós preokupa ho meja Parlamentu Nasionál ne’ebé deputadu baku rahun tanba iha ninia valor istóriku ne’ebé boot tebes. Iha  meja ne’e nia leten mak deputadu na’in-88 halo asinatura ba Konstituisaun RDTL.

Membru Assembleia Konstituinte eleitu iha 3 agostu 2001 ho papél hakerek Konstituisaun Repúblika Demokratika Timor-Leste. Assembleia kompostu hosi deputadu 88 hosi partidu polítiku sanulu-resin-rua. Assembelia Konstiuinte  ikusmai transforma ba Parlamentu Nasional Timor-Leste ho deputadu na’in-88 iha primeira lejislatura.

 

MÍDIA PR.