SEKRETÁRIU JUDISIÁL SEI TULUN JUIZ SIRA HALAIS NINIAN SERBISU

by Mídia PR Posted on

Palásiu Prezidensiál Nicolau Lobato, Díli, 21 jullu 2020

Prezidente Tribunál Rekursu, Deolindo dos Santos, ohin,  informa ba Prezidente Repúblika,  Francisco Guterres Lú Olo, katak ho posse ba kargu definitivu Sekretáriu Judisial sira sei tulun Juiz sira ihaTribunais  hala’o serbisu ho lalais liután.

Desde restaurasaun independénsia to’o molok posse, Sekretáriu Judisiál asume kargu interinu tanba seidauk priense rekejitus estatutu ne’ebé estabelese. Tomada posse ba Sekretáriu Judisiál horseik sei fasilita prosesu iha Tribunal, liuliu ba Juiz sira, tanba hetan apoiu husi sekretariadu ne’ebé iha papél importante ba prosesu julgamentu kazu ruma.

Molok simu posse, Sekretáriu Judisiál hetan ona formasaun oioin hodi priense rekezitus ne’ebé estabelese iha estatutu.

Prezidente Tribunal Rekursu informa mós kona-ba Tribunal Movel  funsiona hikas fali ona hafoin paradu durante implementasaun estadu emerjénsia. Tribunal iha Baucau halo julgamentu ba kazu hamutuk 50 iha Viqueque no Tribunal iha Suai halo julgamentu ba kazu liu metade husi 50.

Tribunal iha hanoin atu masimiza funsionamentu Tribunal Movel maibé iha difikuldade ho orsamentu tanba makina orgaun estadu hotu-hotu la’o sistema duodesimal.

Husi 1 agostu-15 setembru 2020 juiz sira sei tama iha feriadu judisiál. Maske juiz sira sei tama iha feriadu judiasial maibé barak mak sei la foti ferias tanba hakarak prosesa kazu sira ne’ebé rejista iha Tribunal durante funsionamentu normal hafoin fulan tolu implementasaun estadu emerjénsia.

Iha periodu ferias judisiál Tribunal sei hala’o nafatin nia funsaun, julgamentu, primeiru interrogatóriu, inkeritu no prosesu sumariu sei la’o nafatin. Juiz sei serbisu iha turnu atu hatan ba prosesu rejistadu iha Tribunal sira. Juiz sira sei halo julgamentu ba kazu sira ho karakter urjensia no ba prosesu sira ne’ebé marka tiha ona atu nune’e labele lakon provas.

MÍDIA PR.