KONSELLU ESTADU REKOMENDA PREZIDENTE REPÚBLIKA HUSU AUTORIZASAUN PARLAMENTU NASIONÁL

by Mídia PR Posted on

Palásiu Prezidensiál Nicolau Lobato, Díli, 31 agostu 2020

Konsellu Estadu rekomenda ba Prezidente Repúblika atu husu autorizasaun husi Parlamentu Nasionál ba renovasaun estadu emerjénsia.

Iha reuniaun Konsellu Estadu, ne’ebé hala’o ohin, iha Palásiu Prezidensiál, membru sira rekomenda ba Prezidente Repúblika atu husu autorizasaun ba Parlamentu Nasoinál molok dekreta estadu emerjénsia.

“Konsellu Estadu fó rekomendasaun ba Xefe Estadu atu haruka pedidu estadu emerjénsia ba Parlamentu Nasionál,” Chefe da Casa Civíl, Francisco Maria de Vasconcelos hateten.

Governu nia pedidu ba renovasaun estadu emerjénsia tanba haree ba númeru kazu konfirmadu iha infesaun ho SARS-COV2, tuir dadus husi Organizasaun Saúde Mundiál, iha loron 25 agostu 2020, hamutuk 23.183.43  no husi númeru ne’e hamate ona ema 81492 mundialmente.

Númeru kazu ho COVID-19 iha paises viziñu ho Timor-Leste, nomeadamente Indonézia no Austrália aumenta babeibeik. Iha Indonézia, ne’ebé Timor-Leste fahe nia fronteira terrestres rejista kazu hamutuk 155412 no iha Austrália hamutuk 24916, tuir dadus husi Organizasaun Saúde Mundiál.  Tanba ne’e, renovasaun estadu emerjénsia nu’udar medida ida hodi prevene no kontrolu COVID-19 atu hases sidadaun hotu-hotu husi kalamidade públika.

Tuir Konstituisaun, artigu 85, alinea g, Prezidente Repúblika sei konsulta hodi rona Konsellu Estadu no Konsellu Superior Defeza no Seguransa nia hanoin kona-ba deklarasaun estadu emerjénsia.

Prezidente Repúblika, aban, 1 setembru, tuku 9.30, iha Palásiu Prezidénsial Nicolau Lobato, sei rona hanoin husi Konsellu Superior Defeza no Seguransa.

Governu propoin renovasaun estadu emerjénsia ba períodu loron tolu-nulu(30). Estadu emerjénsia ne’ebé Prezidente Repúblika dekreta, iha 5 agostu, ba periódu loron tolu-nulu (30), sei remata iha 4 setembru 2020.

Estadu Emerjénsia signifika katak sei iha medidas ne’ebé limita ka supende direitu balun liberdade balun no garantias balun ne’ebé Konstituisaun fó ba sidadaun ida-idak. Governu hanoin katak ho medidas sira ne’e mak ita bele kombate no hamenus moras ne’e daet husi ema ba ema, iha Timor-Leste.

Hafoin rona ona opiniaun husi  membrus Konsellu Superior Defeza no Seguransa no Konsellu Estadu no haree katak presiza halo duni renovasaun Estadu Emerjénsia,   Prezidente Repúblika sei husu autorizasaun husi Parlamentu Nasionál, liuhusi  Mensájen ida. Karik Parlamentu Nasionál aprova, Prezidente Repúblika sei dekreta renovasaun Estadu Emerjénsia liuhusi Dekretu Prezidensiál.

Membru  sira ne’ebé halo parte Konsellu Estadu mak Prezidente Repúblika Francisco Guterres Lú Olo, Eis-Prezidente Repúblika Xanana Gusmão, Eis-Prezidente José Ramos-Horta, Eis-Prezidente Repúblika no atuál Primeiru-Ministru Jeneral Taur Matan Ruak,  Prezidente Parlamentu Nasionál Aniceto Longuinhos Guterres Lopes.  Halo parte mós Konsellu ne’e  membru sira nomeadu husi Prezidente Repúblika: Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa.  Husi Parlamentu Nasionál: Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite no  José dos Santos ‘Naimori Bucar’.

Membru  sira ne’ebé halo parte Konsellu Superior Defeza no Seguransa mak: Prezidente Repúblika Francisco Guterres Lú Olo, Primeiru-Ministru no Ministru Interiór Taur Matan Ruak, Ministra Negósius Estranjeirus no Kooperasaun  Maria Adalzija Magno, Ministru Defeza Filomeno Paixão,   Ministru Justisa Manuel Cárceres, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa no Diretór Jerál Servisu Nasionál Intelijénsia Manuel Serrano. Halo mós parte iha Konsellu ne’e,  membru sira nomeadu  husi Parlamentu Nasionál: Adérito Hugo da Costa, David Dias Ximenes, Abel Pires da Silva. Membru sira nomeadu husi Prezidente Repúblika mak: José Manuel Fernandes ‘Nakfilak’ no Cristina da Silva.

MÍDIA PR.