PREZIDENTE REPÚBLIKA SEI REUNE HO KONSELLU ESTADU NO KONSELLU SUPERIOR DEFEZA NO SEGURANS

by Mídia PR Posted on

KOMUNIKADU IMPRENSA

Palásiu Prezidensiál Nicolau Lobato, Díli, 29 setembru 2020

Prezidente Repúblika, Francisco Guterres Lú Olo,  aban, 30 setembru, sei reune ho Konsellu Estadu no Konsellu Superior Defeza no Seguransa hodi rona hanoin sira kona-ba pedidu husi Governu kona-ba renovasaun estadu emerjénsia ba periódu loron tolu nulu ba oin.

Periódu estadu emerjénsia ba dalimak nian, hahú husi 5 setembru, sei termina iha 4 outubru 2020.

Haree ba pandemia COVID-19 ne’ebé seidauk hatene bainhira mak atu hotu.  Númeru kazu pozitivu iha país viziñu sira, Australia no Indonézia, liuliu ho provinsia Nusa Tenggara Timur ne’ebé fahe nia fronteira terrestres hamutuk ho Timor-Leste, moras coronavirus aumenta. Atu evita  risku importasaun moras coronavirus hadaet mai territóriu nasionál no aplika medidas restritu ba prevensaun no kontrolu ninian, Konsellu Ministru aprova renovasaun estadu emerjénsia no haruka pedidu mai Prezidente Repúblika atu deside.

Implementasaun estadu emerjénsia nu’udar medidas prevensaun no kontrolu ba COVID-19 hodi hases sidadaun hotu-hotu iha Timor-Leste husi kalamidade públika.

Prezidente Repúblika uza nia poder konstitusionál tuir artigu 85,  alínea g, konvoka membru sira seluk husi órgaun konsulta  –  Konsellu  Superior Defeza no Seguransa no Konsellu Estadu –  atu rona ida-idak ninia hanoin kona-ba pedidu deklarasaun estadu emerjénsia husi Governu.

Reuniaun Konsellu Superior Defeza no Seguransa  sei hahú aban, tuku 9 liu minutu 30 dadersan no   Konsellu Estadu, sei hahú tuku 11.

Hafoin tetu opiniaun husi  membrus Konsellu Superior Defeza no Seguransa no Konsellu Estadu mak Prezidente Repúblika foin deside.  Karik Prezidente Repúblika  deside katak presiza  duni Deklarasaun Estadu Emerjénsia,  sei  husu autorizasaun husi Parlamentu Nasionál, liuhusi  mensájen ida. Karik Parlamentu Nasional aprova pedidu ne’e, Prezidente Repúblika sei deklara Estadu Emerjénsia liuhusi Dekretu Prezidensiál.

Konvite husi Prezidente Repúblika hato’o ona ba membru hothotu Konsellu rua ne’e.

Membru  sira ne’ebé halo parte Konsellu Superior Defeza no Seguransa mak: Prezidente Repúblika Francisco Guterres Lú Olo, Primeiru-Ministru no Ministru Interiór Taur Matan Ruak, Ministra Negósius Estranjeirus no Kooperasaun  Maria Adalzija Magno, Ministru Defeza Filomeno Paixão,   Ministru Justisa Manuel Cárceres, Xefe Estadu Maior Jeneral F-FDTL Lere Anan Timur, Komisáriu PNTL Faustino da Costa no Diretór Jerál Servisu Nasionál Intelijénsia Manuel Serrano. Halo mós parte iha Konsellu ne’e,  membru sira nomeadu  husi Parlamentu Nasionál: Adérito Hugo da Costa, David Dias Ximenes, Abel Pires da Silva. Membru sira nomeadu husi Prezidente Repúblika mak: José Manuel Fernandes ‘Nakfilak’ no Cristina da Silva.

Membru  sira ne’ebé halo parte Konsellu Estadu mak Prezidente Repúblika Francisco Guterres Lú Olo, Eis-Prezidente Repúblika Xanana Gusmão, Eis-Prezidente José Ramos-Horta, Eis-Prezidente Repúblika no atuál Primeiru-Ministru Jeneral Taur Matan Ruak,  Prezidente Parlamentu Nasionál Aniceto Longuinhos Guterres Lopes.  Halo parte mós Konsellu ne’e  membru sira nomeadu husi Prezidente Repúblika: Óscar Lima, Alcino de Araújo Barris, Maria Dadi Soares Magno, Laura Soares Abrantes no Faustino da Costa.  Husi Parlamentu Nasionál: Eduardo de Deus ‘Dusae’, Aurora Ximenes, José Cornélio Guterres, Árcangelo de Jesus Gouveia Leite no  José dos Santos ‘Naimori Bucar’.

MÍDIA PR.