MINISTRU DEFEZA RELATA PRIORIDADE SERVISU 2021 BA XEFE ESTADU

by Mídia PR Posted on

Palásiu Prezidensiál Nicolau Lobato, Díli, 13 outubru 2020

Ministru Defeza Filomeno Paixão, ohin, hasoru malu ho Prezidente Repúblika, Francisco Guterres Lú Olo, hodi ko’alia kona-ba programa prioridade sira husi Ministériu Defeza iha 2021.

Nia hateten iha tinan oin, Ministériu Defeza sei tau atensaun ba estabelesesimentu Autoridade Marítima no Konseitu Estratéjiku Militar ne’ebé “sei haree ba dezenvolvimentu sistema-de-forsas ho dispozitivu-de-forsas ba iha F-FDTL”.

Tuir Ministru Filomeno Paixão, Autoridade Marítima sei koordena husi Xefe Estadu Maior Jenerál-F-FDTL Majór-Jeneral Lere Anan Timur no kompostu husi liñas ministerial sira ne’ebé iha ligasaun servisu ho area marítima.

Ho estabelesimentu autoridade ne’e, tuir Ministru Defeza, Estadu bele halo poupansa iha “formasaun kapasidades”.

“Lalika halo mariña barabarak, basta F-FDTL iha ró-ahi to’o Kosta-Sul to’o Zona Ekonomia Eskluziva ne’eba, hotu-hotu ne’ebé iha intervensaun iha tasi-laran bele sa’e ró ne’e halo sira nia atuasaun”, afirma Ministru Filomeno Paixão.

Atu fasilita servisu Autoridade Maritima nian, tuir Ministru Defeza, tinan oin, sei harii sede Komponente Naval ho parte balu husi sede ne’e, sei uza mós hanesan sede husi Autoridade Marítima, iha Hera, Díli.

Iha Komemorasaun Aniversáriu Komponente Naval F-FDTL ba dala-18, iha janeiru tinan ne’e,  Prezidente Repúblika afirma Timor-Leste nu’udar nasaun mesak labele fó seguransa ba nia tasi tanba ne’e presiza promove seguransa koletiva ka seguransa rejionál hamutuk no salienta kona-ba importánsia harii Sistema Nasionál Autoridade Marítima.

Timor-Leste iha kooperasun trilateral ho Indonézia no Japaun atu asegura tasi. Iha parte seluk, Governu Australia oferese ona ró militár rua ne’ebé sei entrega iha 2023 no hatudu tiha ona nia vontade atu koopera ho Timor-Leste atu tau matan ba seguransa marítima.

 

 

MÍDIA PR