ORGAUN KONSULTIVU RUA HUSU PREZIDENTE REPÚBLIKA HARUKA MENSAJEN BA PARLAMENTU NASIONÁL

by Mídia PR Posted on

Palásiu Prezidensiál Nicolau Lobato, Díli, 26 outubru 2020

Konsellu Superior Defeza no Seguransa no Konsellu Estadu ho unanimidade husu Prezidente Repúblika, Francisco Guterres Lú Olo, haruka mensajen ba Parlamentu Nasionál atu fó autorizasaun ba deklarasaun estadu emerjénsia  tuir pedidu husi Governu ba loron tolu nulu.

Chefe Casa Militár, Coronél António Soares da Silva “Mau-Kalo”, hafoin reuniaun Konsellu Superior Defeza no Seguransa no Konsellu Estadu, prezide husi Prezidente Repúblika, hateten:

“Husi Konsellu rua ho unanimidade husu Prezidente Repúblika atu estende nafatin estadu emerjénsia.”

Prezidente Repúblika sei haruka mensajen ba Parlamentu Nasionál husu autorizasaun molok deklara estadu emerjénsia.

Chefe Casa Militár hateten katak Timor-Leste nu’udar país ne’ebé ki’ik, ho kondisaun infraestrutura ho rekursu ne’ebé sei menus, tanba ne’e ai-moruk ida ne’ebé di’akliu ba kombate coronavirus mak prevensaun.

Pedidu Governu ba estensaun estadu emerjénsia ninian tanba haree ba evolusaun preokupante ba situasaun epidemiolòjika no proliferasaun kazu rejistadu ho COVID-19 ne’ebé aumenta iha nível rejionál no nível mundiál.

Governu hato’o pedidu ba Prezidente Repúblika atu halo renovasaun ba estadu emerjénsia tanba periódu loron tolu-nulu (30)  estadu emerjénsia ba daneen, hahú husi 5 outubru,  sei termina iha 3 novembru 2020.

Timor-Leste rejista kazu pozitivu ho COVID-19 na’in-1. Desde 21 marsu to’o ohinloron, ema na’in 28 rekuperadu no laiha ema ida mak mate.

Hafoin Timor-Leste rejista kazu pozitivu COVID-19 na’in-1, iha 23 marsu 2020, Konsellu Ministru aprova pedidu ida atu husu Prezidente Repúblika deklara estadu emerjénsia. Hafoin rona Konsellu Superior Defeza no Seguransa no Konsellu Estadu,  iha 25 marsu, Prezidente Repúblika hakerek karta ba Parlamentu Nasionál husu autorizasaun atu deklara Estadu Emerjénsia. Iha loron 27 marsu, Prezidente Repúblika deklara estadu emerjénsia ba periodu loron-30.  Desde fulan marsu 2020, Estadu Timor-Leste deklara ona estadu emerjénsia ba daneen.

Moras coronavirus nu’udar kazu importadu tanba ne’e Governu hasai medidas fortes ba periódu estadu emerjénsia ne’ebé hahú 5 outubru katak sira ne’ebé sai-tama Timor-Leste la kumpre regras, sei selu multa entre dolar tolu-nulu no atus rua lima nulu no tenke selu rasik sira-nia kuarentena.

Governu implementa medidas prevensaun liuhusi selu multa ba sira ne’ebé la kumpre regras tanba númeru sidadaun sira halo pasajen ilegal iha fronteira terrestes aumenta. Tama no sai ilegalmente mai territóriu nasionál bele lori risku ba propagasaun moras coronavirus iha komunidade nia leet.

MÍDIA PR.