PNTL KAPTURA TIMOROAN HALO PASAJEN ILEGAL NA’IN 14

by Mídia PR Posted on

Palásiu Prezidensiál Nicolau Lobato, Díli, 15 outubru 2020

Komandante Jerál PNTL, Komisáriu Faustino da Costa, ohin,  informa ba Prezidente Repúblika, Francisco Guterres Lú Olo kona-ba seguransa iha área fronteira hodi kaptura sidadaun Timoroan ne’ebé halo pasajen ilegal hamutuk na’in-14, iha semana ida nia laran.

Sidadaun ne’ebé hala’o pasajen ilegal liuhusi fronteira terrestres nu’udar membru grupu arte marsiais no estudante sira ne’ebé kontinua hela sia-nia estudu iha Indonézia.

Tuir medidas implementasaun estadu emerjénsia ba sidadaun sira ne’ebé halo pasajen ilegal sei selu multa entre $ 30- $250  no selu rasik kustu kuarentena durante loron-14 nia laran.

Komandante Jerál PNTL informa situasaun rodaviaria hodi rejista asidentes hamutuk 36 no hamate ema na’in-6.  Asidente sira ne’ebé akontese tanba kauza husi neglejiensia umana katak la kondús ho kuidadu.

MÍDIA PR.