PREZIDENTE REPÚBLIKA APRESIA PLANU PREZERVASAUN MEMORIÁL PALÁSIU NOBRE

by Mídia PR Posted on

Palásiu Prezidensiál Nicolau Lobato, Díli, 14 outubru 2020

Prezidente Repúblika, Francisco Guterres Lú Olo, apresia aprezentasaun husi ekipa Centro Nacionál Chega lidera husi ninian diretór ezekutivu, Hugo Fernandes, kona-ba planu prezervasaun memoriál Palásiu Nobre, Lahane, Díli.

Prezidente Repúblika hateten katak planu prezervasaun memoriál ne’ebé aprezenta husi Centro Nacional Chega ho dezeñu furak tebes no Prezidénsia sei deside dezeñu ne’ebé atu uza ba prezervasaun memoriál Palásiu Nobre.

Prezidénsia Repúblika koopera ho Centro Nacional Chega atu harii sentru memoriál ida iha Palásiu Nobre atu hanoin hikas filafali serimónia investidura Prezidente Repúblika Francisco Xavier do Amaral ne’ebé hala’o iha 29 novembru 1975 no posse ba membru Governu dahuluk, iha 30 novembru 1975.

Centro Nacional Chega halibur tiha ona gravasaun audio kompletu ba serimónia investidura ba Prezidente Repúblika, Francisco Xavier do Amaral ninian ne’ebé bele sai parte husi prezervasaun memória ida ne’e.

Prezervasaun memorial iha Palásiu Nobre, Lahane sei sai fatin ida rekoñesimentu públiku, komemorasaun, solidariedade ba ema, reflesaun atu aprende no destinu turístiku ida.

MÍDIA PR.