PREZIDENTE REPÚBLIKA KO’ALIA PROPOSTA OJE 2021 HO PM

by Mídia PR Posted on

Palásiu Prezidensiál Nicolau Lobato, Díli, 15 outubru 2020

Primeiru Ministru, Taur Matan Ruak, hateten Governu sei halo esforsu hodi aloka osan ba setór produtivu iha proposta Orsamentu Jerál Estadu 2021, ne’ebé iha 12 outubru liuba, Konsellu Ministru aprova ho montante milaun 1.895 dólar amerikanu.

Primeiru Ministru informa asuntu ne’e, hafoin hasoru malu ho Prezidente Repúblika, Francisco Guterres Lú Olo, iha sira-nia audiénsia semanal. Sein esplika klaru kona-ba valor ne’ebé sei aloka ba setor hirak ne’e, Primeiru Ministru hateten:

“Ita halo esforsu para aloka ba area sira importante hanesan edukasaun ,saúde, agrikultura, turizmu, area ekonómika, sosiál, infrastruturas, dezenvolvimentu institusional, ita tau hotu osan”, afirma Primeiru Ministru, ne’ebé iha enkontru ho Xefe Estadu ne’e “informa de’it asuntu rua ba sua Exelensia, ida, maka kona-ba seguransa ita-nia nasaun nian ida no ida seluk maka Orsamentu Jeral Estadu 2021 ne’ebé prazu ohin atu entrega ba Parlamentu Nasionál”.

Relasiona ho notísia resignasaun Ministru Finansas, Fernando Hanjam, Primeiru Ministru Taur Matan Ruak esplika:” Ha’u sidauk simu karta resignasaun. Saida mak ha’u fó, autorizasaun para Señor Ministru kontinua estadu convalescença, katak deskansa iha uma tanba nia saúde la permite para nia kontinua nia servisu. Uma vez ke rekupera nia sei haree fila fali nia servisu.

Mídia PR