PREZIDENTE REPÚBLIKA PREOKUPA HO VETERANU NE’EBÉ ENVOLVE IHA FALSIFIKASAUN DOKUMENTUS

by Mídia PR Posted on

Palásiu Prezidensiál Nicolau Lobato, Díli, 19 outubru 2020

Prezidente Repúblika, Francisco Guterres Lú Olo, preokupate tebes ho veteranu ne’ebé envolve iha falsifikasaun dokumentus atu hetan osan.

Prezidente Repúblika preokupa ho envolvimentu veteranu nian iha falsifikasaun dokumentus, ho dalan ilegal atu simu osan,  hodi hetan rekoñesimentu husi estadu, ne’ebé tuir loloos veteranu tenke sai ezemplar ba sidadaun sira seluk tanba kontribuisaun iha luta libertasaun nasionál.

Tuir Prokuradór Jerál Repúblika, José da Costa Ximenes, hafoin audiénsia ho Prezidente Repúblika informa katak veteranu ne’e envolve iha kazu falsifikasaun dokumentus barak no agora hetan ona pena iha prizaun.

Iha 16 outubru Tribunal Distrital Díli fó pena ba autór sira no obriga atu selu filafali indiminizasaun ho valór osan $93.547. Prokuradó Jerál Repúblika husu  ba Ministru ba Assuntus Veteranus ninian atu foti medidas rigorozu ba autór ne’ebé envolve iha kazu falsifikasaun dokumentus. José da Costa Ximenes haktuir katak envolvimentu veteranu nian la’ós de’it kona-ba falsifikasaun dokumentus, maibé mós ba projetu infraestrutura sira ne’ebé hetan husi estadu.

Prokuradór Jerál Repúblika kestiona desizaun juiz iha Tribunal Distrita Díli ne’ebé fó pena tinan 5 ba kazu droga ba autór krime kaer iha 14 janeiru 2020. Prokuradór kestiona desizaun juiz ne’ebé fó pena tinan 5 ba kazu droga ho todan 3,53 kilograma. José da Costa Ximenes informa katak la simu desizaun husi juiz ne’e,  tanba ne’e Ministériu Públiku hatama ona rekursu liuhusi Tribunal Distrital Díli ba Tribunal Rekursu.

“Buat ne’ebé ami preokupa  uitoan mak mak juiz prezide julgamentu ida ne’e, foin tama iha karera seidauk to’o tinan ida.  Se iha kazu balun, uluk kilograma 1 ba 10 anos, agora kilograma ba 5 anos,” Prokuradór Jerál Repúblika hateten.

Territóriu Timor-Leste ohinloron kriminozu sira uza  nu’udar fatin tranzitu ba destinu faan droga iha nasaun seluk. Prokuradór Jerál Repúblika kestiona desizaun juiz ninian no hatama rekursu hasoru desizaun kaman husi tribunal tanba desizaun ne’e sei halo Timor-Leste kontinua sai fatin tranzitu ba krime organizadu sira relasiona ho sirkulasaun droga ninian. Juiz ne’ebé seidauk iha esperiénsia naton bele kaer kazu sira kaman hodi nune’e bele manán esperiénsia molok kaer kazu boot hanesan krime organizada.

“Ha’u aviza tanba saida mak ema uza Timor-Leste sai hanesan fatin tranzitu. Primeirum sistema kontrolu frajil, segundu kestaun kuadru legal, terseiru pena ne’ebé ki’ik. 3 kilograma droga puru, bele multiplika valór mais 3 miloins dolares amerikanu. Pena hanesan bele loke tan odamatan atu tama mai Timor-Leste,” José da Costa Ximenes hateten.

Ba projetu infraesturuta hamutuk 145 ne’ebé estadu presiza selu. Prokuradór Jerál Repúblika hateten katak balun iha kontratu, balun laiha kontratu, balun laiha kontratu no projetu seidauk halo. Buat ne’ebé sai problema mak laiha kontratu maibé serbisu halo tiha ona. Kontratu laiha, estadu laiha dever atu selu.

“Buat ne’ebé problema mak kontraltu laiha, serbisu halo ona.  Maibé, purezempu dehan halo ponte, mota iha ne’ebá, pontu iha ne’ebá, dudu ses hotu ona, agora mota ida mós laiha, agora atu selu saida. Projetu halo mós dehan hanesan la halo. Husu pagamentu atu halao saida? Kontratu laiha tan. Kualker estadu ida iha mundu kontra nia dever bainhira iha nia kontratu. Laiha kontratu di’ak liu lalika paga,” Prokuradór Jerál Repúblika hateten.

Prokuradór Jerál Repúbliku ejize ba Parlamentu Nasionál bele aselera Lei Rekuperasaun Ativus atu nune’e bele administra bens ne’ebé estadu prende. Iha tempu badak Prokuradór Jerál Repúblika, Patrimóniu Estadu no PNTL sei halo lelaun ba motorizada hamutuk 153 tanba laiha dokumentus komprovativu, ne’ebé konsidera nu’udar estadu ninian.

MÍDIA PR.