XEFE ESTADU MAIOR JENERÁL ESPERA GOVERNU IDA ESTAVEL HADI’A POVU-NIA MORIS

by Mídia PR Posted on

Palásiu Prezidensiál Nicolau Lobato, Díli, 14 outubru 2020

Prezidente Repúblika, Francisco Guterres Lú Olo hala’o enkontru semanal ho Xefe Estadu Maior Jenerál Forsas Armadas F-FDTL, Majór Jenerál Lere Anan Timur,ne’ebé iha enkontru ne’e informa situasaun Forsas Armadas no situasaun seguransa rai-laran.

Majór Jenerál Lere Anan Timur haktuir, ho situasaun polítika ne’ebé la estavél no orsamentu estadu ne’ebé durante ne’e la’o de’it ho duodecimo, kria difikuldade ba Instituisaun hotu, inklui F-FDTL, hodi hala’o nia programa.

Nune’e nia espera situasaun sira ne’e bele rezolve lalais hodi Governu bele konsentra atu kria kondisaun moris ba povu, ba veteranus no instituisaun estadu bele iha progresu.

“Sé de’it forma Governu laiha problema, ha’u-nia kestaun mak ida ne’e, Governu ida tenki estavel (…) Ami laiha kompeténsia ba area ida ne’e, mas ami husu de’it estabilidade governamental (…) atu rezolve problema ita-nia povu nian i rezolve problema instituisaun sira nian”, afirma Majór Jenerál Lere Anan Timur.

Relasiona ho kestaun ne’e, Prezidente Repúblika, tuir Xefe Estadu Maior Jenerál Forsas Armadas, hateten: “Señor Prezidente Repúblika sem dúvida, nia nu’udar Komandante Supremu-das-Forsas Armadas, nia iha preokupasaun duni. Agora, nia mós labele deside. Nia tenki hato’o ba orgaun kompetente ke é Governu, Primeiru Ministru, atu bele haree ho Ministru Defeza atu bele haree problemas hirak ne’e”.

Majór Jenerál Lere Anan Timur subliña maske enfrenta difikuldade oioin maibé F-FDTL firme ho kontinua kumpri nia misaun hodi asegura Timor-Leste nia soberania.

MÍDIA PR.