PREZIDENTE REPÚBLIKA FELISITA GRUPU PRODUSAUN KULAT FATUQUERO

by Mídia PR Posted on


Gleno, 18 novembru 2020

Prezidente Repúblika, Francisco Guterres Lú Olo, vizita Grupu Industria Produsaun Kulat (Kogumelu) ne’ebé harii husi inisiativa joven na’in walu iha Suku Fatuquero.

Vizita Xefe Estadu ne’e aleinde atu haree besik atividade ne’ebé grupu ne’e hala’o, mós atu hatene progresu no dezafiu ne’ebé grupu ne’e enfrenta iha sira-nia negósiu.

Tuir esplikasaun koordenadór grupu, Cornélio Gagu, ba Prezidente Repúblika, ho kulat ne’ebé kada semana bele koileta dala tolu ne’e, sira uza hodi prodús fali ba kerupuk-kulat no fa’an fali ba loja sira iha Dili.

Kerupuk-kulat kada 100 gram sira fa’an $ 0.75 no 1 kg ho folin $ 7.00. Portantu, rendimentu husi negosiu kada fulan sira hetan másimu $ 1.200 no minimu $ 600.

Krupuk-kulat hanesan espesia “biskuit-sona husi kogumelu” ho nia orijen husi Indonézia.

Produsaun kulat ne’e rasik uza matéria prima hanesan ai-uut, haree-uut no ahu-mama.

Prezidente Francisco Guterres Lú Olo kongratula inisiativa husi grupu ne’e no husu atu kontinua sira-nia produsaun hodi hakbiit ekonomia kada membru, ne’ebé sei kontribui mós ba ekonomia nasaun nian.

Grupu ho membru hamutuk na’in 10 ne’e, hahú sira-nia produsaun kulat iha 2017 maibé iha fulan balu para tiha. No husi 2018 sira kontinua fali to’o agora.

MÍDIA PR