PREZIDENTE REPÚBLIKA REKOÑESE EMBAIXADÓR KOREA SUL NIA ESFORSU HAMETIN RELASAUN BILATERÁL

by Mídia PR Posted on

Palásiu Prezidensiál Nicolau Lobato, Díli, 17 novembru 2020

Prezidente Repúblika Francisco Guterres Lú Olo hato’o ninian rekoñesimentu ba esforsu Embaixadór Repúblika Koreia ba Timor-Leste Lee Chin-bun atu hametin liután relasaun bilateral.

Prezidente Repúblika hateten katak relasaun di’ak tebes entre nasaun rua hahú kedas ho partisipasaun militár Repúblika Koreia nian iha Forsa Manuntensaun Pás Organizasoins Nasoins Unidas husi 1999 to’o 2003.

Partisipasaun militár Repúblika Koreia nian iha Timor-Leste durante hala’o misaun, na’in-lima mak lakon sira-nia vida iha Oe-cusse.

Xefe Estadu agradese no rekoñese kontribuisaun Repúblika Koreia no sei hametin liután ho reprezentante diplomátika foun ne’ebé sei hala’o nia misaun iha Timor-Leste.

Xefe Estadu hato’o nia agradesimentu ba Governu ne’ebé simu traballadór Timor-Leste serbisu iha Koreia. Tinan-tinan Governu Korea liuhusi Employment Permit System simu traballadór husi Timor-Leste hamutuk na’in-300-400.

Embaixadór apresia lideransa Prezidente Repúblika ninian hasoru dezafiu oioin, liuliu relasiona ho situasaun krize polítika no pandemia COVID-19. Reprezentante diplomátika hateten katak Timor-Leste iha esperansa boot atu la’o ba oin.

Reprezentante Governu Koreia agradese tebes jestu jenerosidade estadu Timor-Leste nian ne’ebé sei kondekora militár Koreia na’in-lima ne’ebé mate iha Oe-Cusse, iha tinan-17 liuba.

Governu Koreia hatudu nafatin nia prontidaun atu fó apoiu ba Timor-Leste. Iha futuru sei hametin liután utilizasaun teknolojia online ninian iha área edukasaun.

Kooperasaun Koreia iha Timor-Leste konsentra iha dezenvolvimentu rurál liuhusi Semaul Undong, saúde, edukasaun no juventude no teknolojia informasaun.

Embaixadór Lee Chin-bun despede Prezidente Repúblika hafoin remata nia misaun iha Timor-Leste.

MÍDIA PR.