PROGRAMA SESTA BÁZIKA SEI BELE HADIA

by Mídia PR Posted on


Palásiu Prezidensiál Nicolau Lobato, Díli, 26 novembru 2020

Prezidente Repúblika Franciso Guterres Lú Olo, ohin, rona informasaun husi Primeiru Ministru Taur Matan Ruak kona-ba programa sesta bázika, pagamentu ba reklamante apoiu finanseiru ba família iha ámbitu COVID-19 no estensaun estadu emerjénsia.

Hafoin audiénsia ho Prezidente Repúblika, Primeiru Ministru informa katak akompaña programa sesta bázika ne’ebé implementa husi membru Governu, ajensia no empreza sira:

“Ha’u haree, rona, komunidade sira manifesta. Ministériu sira ne’ebé toma konta atividade ne’e sira loronloron liga iha terrenu, loronloron sira haree saida mak sei halo atu depois bele hadi’ak. Tanba ne’e esperiénsia ida ne’ebé ita foin hahú. Naturalmente ita aprende ao longo de implementasaun. Ne’e la’ós envolve de’it Governu, envolve mós ajensia sira seluk, empreza sira ne’ebé ajuda fahe produtu. Governu iha nosaun ida ne’e kontinua serbisu atu hadi’ak liután.”

Iha implementasaun programa sesta bázika, Primeiru Ministru enkoraja instituisoins estadu ninian atu ezerse nia papél kontrolu.

“PDHJ ko’alia, CAC mós ko’alia. Se hadi’a di’ak liu sei halo ema hotu-hotu kontente,” Xefe Governu hateten.

Konsellu Ministru aprova renovasaun estadu emerjénsia ba loron tolu-nulu. Implementasaun estadu emerjénsia ba dahituk sei remata iha 3 dezembru. Haree ba risku COVID-19 iha país viziñu sira, liuliu Indonézia ne’ebé Timor-Leste fahe nia fronteira ba, renovasaun ba estadu emerjénsia nesesáriu tebes atu hases sidadaun hotu-hotu ne’ebé hela iha Timor-Leste husi moras coronavirus.

“Nasaun sira seluk halo estadu emerjénsia kuandu moras iha ona rai-laran daet ona ba komunidade. Ita-nia oinseluk, ita halo estadu emerjénsia, taka dalan para labele tama iha ita-nia rain. Buat rua ne’e la hanesan,” Primeiru Ministru hateten.

Medidas implementasaun estadu emerjénsia sai fleksivel depende ba evolusaun moras coronavirus iha Timor-Leste. Primeiru Ministru hateten katak kuandu laiha kazu pozitivu aplikasaun estadu emerjénsia fleksivel maibé bainhira COVID-19 nia númeru aumenta sei aplika medidas rigorozu.

Primeiru Ministru informa kona-ba Orsamentu Jerál Estadu husi Rejiaun Administrativu Espesiál Oe-Cusse Ambeno (RAEOA) hodi propoin tan osan ba Ro Haksolok. Primeiru Ministru hateten katak autoridade RAEOA mai ho hanoin katak atu kontinua prosesu atu lori Ro Haksolok mai Timor-Leste presiza osan. Maibé, tuir Primeiru Ministru, desizaun iha Parlamentu Nasionál nia liman.

Timor-Leste atinji ona progresu dezenvolvimentu barak no kontinua halo esforsu atu dezenvolve nasaun hodi halakon kiak no mukit. Prosesu ida ne’ebé la fásil. Maibé, Primeiru Ministru sente orgullu tanba maske nasaun foin moris tinan-20 iha ona avansu barak husi aspetu ekonómikus, demokrasia, dezenvolvimentu fíziku, maske seidauk atinji buat hotu ne’ebé TImoroan hotu-hotu nia hakarak.

MÍDIA PR.