Palásiu Prezidensiál Nicolau Lobato, Díli, 14 dezembru 2020
Prezidente Repúblika, Francisco Guterres Lú Olo, husu ba desterradu Ataúro atu kontinua organiza-an hodi kontribui dezenvolvimentu nasionál.
Prezidente Repúblika husu Comissão Instaladora Desterrado Ataúro (CIDA) atu halo identifikasaun ba nia membru sira iha territóriu nasionál atu iha reprezentasaun no iha planu ne’ebé konkretu kona-ba saida mak sei halo hodi kontribui ba prosesu dezenvolvimentu nasionál.
Atu funsiona nu’udar organizasaun ida, Prezidente Repúblika hateten katak Comissão Instaladora Desterrado Ataúro tenke harii ho personalidade jurídika ida.
Hafoin zona libertadas rahun, husi 1980-1987, militár Indonézia obrigatoriamente desloka timoroan hamutuk liu rihun hitu husi munisípiu 12 no kastigu iha Ataúro tanba partisipasaun iha luta libertasaun nasionál. Maske moris iha kondisaun ne’ebé difísil tebetebes maibé la hamate vontade no kompromisu ba luta libertasaun nasionál.
Portavóz CIDA, Agustinho Gregorio Ramos Tekiloro, hateten iha dezembru 2019, iha hahú halibur malu atu harii organizasaun ida ne’ebé dignifika no valoriza desterradu sira no kontinua bele kontribui ba dezenvolvimentu nasionál.
Tekiloro informa mós katak iha tempu badak sei organiza kongresu nasionál hodi halibur desterradu no nia família sira husi munisípiu hotu-hotu ho hanoin atu harii organizasaun ida ne’ebé defende desterradu nia interese.
MÍDIA PR.