MINISTRU META MALI INFORMA PREPARASAUN LORON NASIONÁL BA EROIS

by Mídia PR Posted on

Palásiu Prezidensiál Nicolau Lobato, Díli, 15 dezembru 2020

Ministru Asuntu Kombatentes Libertasaun Nasionál, Júlio Sarmento da Costa Meta Mali, akompaña husi Sekretáriu Estadu Asuntu Kombatente Libertasaun Nasionál Gil Oan Soro hasoru malu ho Prezidente Repúblika, Francisco Guterres Lú Olo hodi ko’alia kona-ba preparasaun ba selebrasaun Loron Nasionál ba Erois, 31 dezembru 2020.

Desde 2017, Prezidénsia Repúblika serbisu hamutuk ho Ministériu Asuntu Kombatentes Libertasaun Nasionál no Ministériu Administrasaun Estatal organiza selebrasaun ba Loron Nasionál Erois no nu’udar mós loron Prezidente Nicolau Lobato mate iha kombate, iha Rotunda Komoro.

Tinan ne’e, Ministériu Asuntu Kombatente Libertasaun Nasionál hato’o fatin ne’ebé Prezidente Repúblika bele konsidera ba seleberasaun loron istóriku ne’e.

Prezidente Repúblika iha tempu badak sei informa ba Ministériu Asuntu Kombatente Libertasaun Nasionál relasiona ho fatin selebrasaun ba Loron Nasionál ba Erois.

Relasiona ho falsifikasaun dokumentus pesoais ba rekoñesimentu nu’udar kombatente libertasaun nasionál, hafoin audiénsia ho Prezidente Repúblika, Meta Mali hateten:

“Nu’udar Ministériu kontribui ba justisa, bom ba nasaun, di’ak ba ema hotu, justisa ba ema hotu, justisa la hili sé. Sé mak kontra, sé mak viola, sé mak halimar, falsfikasoins tenke lori ba justisa. Ministériu la tolera buat ne’e.”

Ministru Meta Mali hateten katak individu balu mak halo falsifikasaun dokumentus, la’ós instituisaun Komisaun Omenajen.

Verifikasaun ba dadus rejistu kombatentes libertasaun nasionál ne’ebé hala’o iha 2009, paradu tanba Orsamentu Jerál Estadu ba tinan-2020 xumba iha Parlamentu Nasionál. Husi 120 kombatentes ne’ebé rejista iha 2009 foin verifika 14 mil. Ho aprovasaun Orsamentu Jerál Estadu ba tinan 2021 iha Parlamentu Nasionál ho hein promulgasaun husi Prezidente Repúblika, Ministériu sei hatutan prosesu verifikasaun ba dadus rejistadu iha 2009.

MÍDIA PR.