NÚMERU PROSESU SIRA IHA TRIBUNÁL KOMESA TUN

by Mídia PR Posted on


Palásiu Prezidensiál Nicolau Lobato, Díli, 15 dezembru 2020

Prezidente Tribunál Rekursu, Deolindo dos Santos, ohin, informa ba Prezidente Repúblika, Freancisco Guterres Lú Olo, katak númeru prosesu sira iha Tribunal komesa tun tanba mudansa sira ne’ebé hala’o iha tinan rua ikus ba melloramentu atendimentu.

Redusaun númeru prosesu iha Tribunál sira akontese tanba movimentasaun juiz sira, mudansa sekretáriu no ofisiál justisa, tribunal movel no kapasitasaun.

Mudansa sira ne’e hala’o ho objetivu melloramentu Tribunal hodi atende públika atu hetan justisa.

Iha territóriu nasionál tomak iha tribunal haat iha Díli, Suai, Baucau no Oe-Cusse. Haree ba nesesidade sidadaun ninian atu hetan justisa, tuir planu, sei harii tan Tribunal Distrial foun tolu iha Ermera, Viquque no Maliana atu hakbesik liután Povu nia asesu ba justisa.Maske nune’e, atu harii Tribunal foun presiza halo uluk revizaun ba Lei Organizasaun Judisiária.

Deolindo dos Santos hateten katak sei masimiza utilizasaun Tribunal Movel atu fó atendimentu ba sidadaun sira ne’ebé dook laiha asesu atu hetan justisa. Prezidente Tribunal Rekursu konfiante katak sei hetan apoiu finanseiru husi parseiru dezenvolvimentu sira ba masimizasaun tribunal movel.

Prezidente Tribunal Rekursu hateten katak to’o ohinloron seidauk simu prosesu rejistrasaun partidu polítiku foun husi Ministériu Justisa.

MÍDIA PR.